قايرات نۇرتاس جاقىن ارادا تىڭدارماندارىنا جاڭا اندەر ۇسىنباق

استانا. قازاقپارات - ءانشى، «مۋز ت ۆ» تەلەارناسىنىڭ ارنايى سىيلىعى - «قازاقستاننىڭ ۇزدىك جىل ءارتىسى» اتالىمىنىڭ جەڭىمپازى قايرات نۇرتاس «قازاقستان» تەلەارناسىنداعى «تاڭشولپان» باعدارلاماسىندا قوناقتا بولدى، دەپ حابارلادى ۇلتتىق ارنانىڭ باسپا ءسوز قىزمەتى.

«سۇحبات بەرمەگەنىمە ءبىراز ۋاقىت بولىپتى. بۇگىن سىزدەردىڭ باعدارلامالارىڭىزعا ءساتى ءتۇسىپ، كەلىپ وتىرمىن. وتە قۋانىشتىمىن. ماعان كوبىنە كوڭىل-كۇيىڭىز قالاي، جانۇياڭىز بار ما دەگەن سۇراقتاردى ءجيى قويادى. ول مەنىڭ جەكە ومىرىمە قاتىستى بولعاسىن، جاۋاپ بەرۋدەن باس تارتۋعا ءماجبۇرمىن. كورەرمەندەر مەنىڭ ونەرىمدى، شىعارماشىلىعىمدى باعالاسا دەيمىن»، - دەپ باستادى اڭگىمەسىن ستۋديا قوناعى.

سىيلىقتى يەلەنگەن كەزدەگى اسەرىمەن بولىسكەن قايرات: «اركىمنىڭ ءوز ارمانى بار. ءوز ەلىڭدە مۇنداي سىيلىق الۋ مەنىڭ عانا ەمەس، ءار ءانشىنىڭ ارمانى، دەپ ويلايمىن. بۇل جۇلدەگە الدىمەن اللانىڭ قالاۋىمەن، سوسىن حالىقتىڭ قولداۋىمەن يە بولدىم. وتە قۋانىشتىمىن. وسى دودادا قارسىلاس بولعان ءار ءانشى مىقتى تالانت. ولارعا الداعى جوبالاردا توپتى جارىپ شىعۋلارىنا تىلەكتەسپىن»، - دەيدى قايرات.

«مۋز ت ۆ» سىيلىعى ەكى ەلدىڭ مادەنيەتىن بىرىكتىرىپ، انشىلەرىن ءبىر-بىرىمەن تانىستىردى، جاقىنداستىردى، ءبىر ساحنادا ءان سالۋعا مۇمكىندىك بەردى. سىيلىقتىڭ ءدال ءبىزدىڭ ەلدە ءوتۋى - ۇلكەن جەتىستىك»، - دەپ اعىنان جارىلدى ق. نۇرتاس.

الداعى جوسپارلارىمەن بولىسكەن ءانشى: «الداعى ۋاقىتتا تىڭدارمانعا ۇسىنار 3-4 ءانىم دايىن تۇر. جاقىن ارادا ۇسىناتىن بولامىن. اندەر ماحاببات جايىندا. ۋاقىتى كەلگەندە حالىق باعاسىن بەرە جاتار»، - دەدى.

كەزدەسۋ سوڭىندا «تاڭشولپان» باعدارلاماسىنىڭ جۇرگىزۋشىسى يرينا تەن قايرات نۇرتاسقا بەكبولات تىلەۋحاننىڭ «قايرات مىڭداعان تىڭدارماننىڭ جۇرەك قىلىن شەرتە بىلەدى» دەگەن جازۋى بار ارنايى سىيلىعىن تابىس ەتتى.