اسەل ءسادۋاقاسوۆا تاعى دا سىننىڭ استىندا قالدى

استانا. قازاقپارات - اسەل ءسادۋاقاسوۆا انشىلىك پەن قاتار پروديۋسەرلىك جۇمىستى قولعا العانىنا ءبىراز ۋاقىت بولدى.

ول ءبىر ەمەس، ەكى بىردەي توپتىڭ العا باسىپ، تانىمالدىلىعىن ارتتىرۋ ءۇشىن تەر توگىپ، ەڭبەك ەتۋدە. الايدا، بەرگەن جەمىسى تىڭدارمانداردىڭ ويىنان شىعا قويمادى.

اسەل ەكى قىزدان تۇراتىن Caffeine توبىنا «ساقينا» دەگەن انگە كليپ ءتۇسىرىپ مۋزىكالىق ارنالاردىڭ بىرىندە كورسەتىلىپ ءجۇردى.

سيۋجەتتە ەكى قىز جىگىت ءۇشىن توبەلەسىپ، ۇستىندەگى كويلەكتەرىنە دەيىن جىرتىپ تاستايدى. كورەرمەندەرگە ۇناماعان تۇسى سول ارۋلاردىڭ جارتىلاي جالاڭاش ءجۇرىپ، اشىق-شاشىق كيىنگەن كيىمدەرى بولدى.

ودان قالسا، ءاننىڭ ءمان-ماعىناسى مەن سالماقتى ويى جوق دەپ جەلىدەگى وقىرماندارى ءبىرتالاي جەرگە اپارىپ تاستاعان ەدى. بۇل ماسەلەگە اسەلدىڭ ءوزى جاۋاپ قايتارمادى. جاڭادان قۇرىلعان Altyn girls توبى دا Caffeine انشىلەرىنىڭ تاعدىرىن قايتالادى دەۋگە بولادى.

بىرنەشە كۇن بۇرىن التىن قىزدارىنا بەينەبايان تۇسىرگەن پروديۋسەرىنىڭ جۇمىسى جۇرتتى تاڭقالدىرا قويعان جوق. «شىنايى سەزىم» اتتى تۋىندىعا ءبىراز شىعىن شىعارىپ، كۇشىن سالعانىمەن حالىق دەگەن سىنشىنىڭ ساداعىنا تاعى ءىلىندى.

بۇل جەردە دە ايتىلعان پىكىرلەردىڭ ءبىرى ءاننىڭ ءسوزى جەڭىل، ءارى ماعىناسىز. ال، بىرەۋلەر ەرەكشە كليپ ومىرگە كەلدى دەپ ماقتاپ قويدى. بارلىق ەلدىڭ كوڭىلىنەن شىعۋ مۇمكىن ەمەس. دەسە دە ەڭبەگى ەلەنبەي قالعان اسەل، Altyn girls توبى تۋرالى نە ايتادى ەكەن؟

comode.kz