قازاقستاندا جاسالعان: «كاريزما» كومپانياسى ءوز ونىمدەرىمەن كەڭىنەن تانىمال - فوتو
مەملەكەتتىڭ قولداۋى ارقاسىندا جيھاز، پروفيل جانە تاۋارلى بەتون ءوندىرىسىن ىسكە قوسقان كومپانيا تۇرعىن ءۇي سالۋمەن دە اينالىسادى. 2004 -جىلى قۇرىلعان «كاريزما» ج ش س اۋەلى تۇركيادان ەسىك-تەرەزە جابدىقتارىن، كەيىن دايىن جيھاز تاسىمالداپ اكەلىپ، ساتتى.
2013 -جىلى «بيزنەستىڭ جول كارتاسى-2020» باعدارلاماسى اياسىندا «دامۋ» كاسىپكەرلىكتى دامىتۋ قورى» اق ارقىلى جەڭىلدەتىلگەن نەسيە الىپ، ءوز ءوندىرىسىن دامىتتى. كومپانيا ەكىنشى دەڭگەيلى بانكتەردەن جيھاز وندىرىسىنە 130 ميلليون تەڭگەدەي، پروفيل وندىرىسىنە 250 ميلليون تەڭگە، بەتون وندىرىسىنە 75 ميلليون تەڭگە نەسيە الدى. نەسيەلەردىڭ پايىزدىق مولشەرلەمەسىنىڭ 7 پايىزىن مەملەكەت وتەۋدە. بۇل، ارينە، ۇلكەن كومەك.
«كاريزما» كومپانيالار توبىنىڭ قۇرىلتايشىسى ءارى باس ديرەكتورى وزگۇر دەميرال تۇركيادا وسكەنمەن، ورالدا وڭ- سولىن تانىپ، قازاق قىزىنا ۇيلەنىپ، ابدەن ءسىڭىسىپ كەتكەن. قازاق ءتىلىن جاقسى بىلەدى. ونىڭ ايتۋىنشا، بۇگىنگى تابىستارعا كومپانيا مەملەكەتتىڭ قولداۋى ارقاسىندا قول جەتكىزىپ وتىر.
بۇرىن 80 ادام ەڭبەك ەتسە، قازىر ولاردىڭ سانى ورالدىڭ وزىندە 180 گە جەتتى. بۇل جاڭا ءوندىرىس ورىندارىنىڭ اشىلۋى ناتيجەسىندە مۇمكىن بولىپ وتىر. جازدا جيھاز وتكىزۋ قيىنداۋ بولعانىمەن، كۇز، قىس ايلارىندا قالىپقا تۇسەدى. باستى ماقسات - ساپالى ونىمدەردى قازاقستان عانا ەمەس، شەت ەلدەرگە دە شىعارۋ.
جيھاز ءوندىرىسى تسەحىندا ءۇي جيھازىنىڭ (جۇمساق جانە كورپۋستىق) بارلىق ءتۇرى دەرلىك شىعارىلادى. فۋرنيتۋرا تۇركيادان اكەلىنەدى، ءبىر تسەحتا جيھاز جينالىپ، كەلەسى سەحتا بويالادى. ودان ءارى تىگىنشىلەردىڭ قولىنان وتەدى. كومپانيا مەنەدجەرى انتون دۋديچتىڭ سوزىنە قاراعاندا، تاۋلىگىنە 15-20 جۇمساق جيھاز، كولەمىنە قاراي 50 كورپۋستىق جيھاز قۇراستىرىلادى. كومپانيا جيھازدى ورالداعى ءوز ساۋدا ورىندارى ارقىلى وتكىزەدى. اتىراۋ، اقتوبە، استانا، پاۆلودار قالالارىندا ورالدىق جيھازدى كوتەرمە باعامەن ساتىپ الىپ، تۇتىنۋشىلارعا ۇسىناتىن كومپانيالار دا بار.
پروفيل ءوندىرىسى سەحىنا قاجەتتى شيكىزات رەسەيدەن، كورەيادان، قىتايدان، گەرمانيادان، تۇركيادان تاسىمالدانادى. پلاستيكالىق ەسىك، تەرەزەگە قوسا، اليۋمينيدەن جاسالاتىن ونىمدەر دە بار. پروفيلدى وزگە وندىرىسشىلەر ساتىپ الىپ، ەسىك- تەرەزە جاساپ وتكىزەدى. ونىمدەرگە سۇرانىس جوعارى، باتىس وڭىردەگى نارىقتىڭ 90 پايىزى وسى كومپانياعا تيەسىلى. پروفيل وندىرىسىنەن كۇللى ەلىمىز بويىنشا ءۇشىنشى ورىندا. ون ءۇش قالاداعى كومپانيا فيليالدارى ارقىلى ورالدىق پروفيل قازاقستانعا تارالادى.
«كاريزما» كومپانياسى 2005 -جىلدان بەرى كوممەرتسيالىق ءۇي سالۋمەن دە اينالىسادى. باستاپقىدا «ۋرالسكۆودسترويمەن» بىرگە ورالعا قاراستى زاشاعان كەنتىندە 60 پاتەرلىك تۇرعىن ءۇيدى سالىپ، پايدالانۋعا بەرسە، ودان كەيىن سادوۆايا كوشەسىندە تاعى ءبىر ءۇيدىڭ قۇرىلىسىن ءبىتىردى. كۇنى بۇگىن 43 پاتەرلىك (وردا كوشەسىندە) جانە 24 پاتەرلىك (ءا. مولداعۇلوۆا كوشەسىندە) ەكى مونوليتتىك تۇرعىن ءۇي بوي كوتەرۋدە.
تاۋارلى بەتون وندىرەتىن سەحتا 15 ادام جۇمىس ىستەيدى، مۇندا جىلىنا 10 مىڭ دانا كەرامزيتتىك جانە قۇمدى كىرپىش، 50 مىڭ تەكشە مەتر تاۋارلىق بەتون شىعارىلادى. ودان باسقا جيەكتاس شىعارىلادى. بۇل ونىمدەر دە ءوتىمدى.
وسىلايشا، شاعىن سەحتان ۇلكەن كومپانيالار توبىنا اينالعان «كاريزمانىڭ» ورالدىڭ وزىندە ءۇش ءوندىرىس ورنى بار. كومپانيا ورالدا 180, وزگە 13 قالاداعى فيليالدارداعى جۇمىسشىلاردى قوسقاندا، بارلىعى 250 ادامدى جۇمىسپەن قامتىپ وتىر.
اۆتور: ەلجان ەرالى
