شىمكەنتتە تۇڭعىش رەت بۇيرەك جانە باۋىر الماستىرۋ وتالارى جاسالدى

شىمكەنت. قازاقپارات - شىمكەنت قالالىق جەدەل مەديتسينالىق كومەك كورسەتۋ اۋرۋحاناسى وبلىس حالقىنا تاۋلىك بويى حيرۋرگيا، جاراقات، ۋرولوگيالىق، نەيروحيرۋرگيالىق، گينەكولوگيالىق، نيەۆرولوگيالىق جانە تەراپيالىق سالالار بويىنشا مامانداندىرىلعان جانە جوعارى مامانداندىرىلعان جەدەل جانە جوسپارلى مەديتسينالىق كومەك كورسەتەتىن كوپ سالالى ستاتسيونار بولىپ تابىلادى.

بۇگىنگى تاڭدا اۋرۋحانادا 425 توسەك ورىن قارالعان، ونىڭ ىشىندە 317 تومەك ورىن حيرۋرگيالىق جانە 108 توسەك ورىن تەراپيالىق سالاعا ارنالعان. بۇل تۋرالى «وڭتۇستىك» اقپارات ورتالىعىندا وتكەن باسپا ءسوز ءماسليحاتىندا اۋرۋحانا باس دارىگەرىنىڭ ورىنباسارى سارسەن پەرنەبەكوۆ مالىمدەدى، دەپ حابارلايدى وبلىس اكىمىنىڭ باسپا ءسوز قىزمەتى.

بۇگىنگى تاڭدا اۋرۋحانادا ەڭبەك ەتەتىن 162 دارىگەردىڭ 2 ءى پروفەسسور، 6 ى مەديتسينا عىلىمىنىڭ كانديداتى بولىپ تابىلادى. مۇندا سونداي-اق 397 ورتا بۋىندى مەديتسينا قىزمەتكەرلەرى ەڭبەك ەتەدى. بيىلعى جىلى 13 دارىگەر قازاقستاندا جانە ودان تىس جەرلەردە «باۋىر ترانسپلانتولوگياسى»، «جەدەل جاعدايلارداعى جانساقتاۋ جانە قارقىندى تەراپيا»، «كلينيكالىق زەرتحانادا يممۋنوفەرمەنتتىك تالداۋ جاساۋدىڭ دياگنوستيكاسى»، «اگيوحيرۋرگيا»، «باس-مي جاراقاتى كەزىندەگى جەدەل جاردەم جانە حيرۋرگيالىق ەمدەۋ دياگنوستيكاسى»، «ەندوسكوپيالىق كومەكتىڭ جاڭاشا تاسىلدەرى» تاقىرىپتارىندا ءبىلىمىن جەتىلدىرگەن.

شىمكەنت قالالىق جەدەل مەديتسينالىق كومەك كورسەتۋ اۋرۋحاناسى وڭىرىمىزدە تۇعىش رەت 2013-جىلدان بەرى بۇيرەك الماستىرۋ وتاسىن جاساپ كەلەدى. 2013-جىلدان بەرى كورەيلىك جانە بەلورۋستىق مامانداردىڭ قاتىسۋىمەن 45 بۇيرەك الماستىرۋ وتاسى جاسالسا، سوڭعى 14 بۇيرەك ترانسپلانتولوگياسى وتاسىنا جەرگىلىكتى ماماندار قاتىستى. ال وتكەن جىلدىڭ جەلتوقسان ايىندا وبلىس تاريحىندا ءبىرىنشى رەت بەلورۋستىق مامانداردىڭ قاتىسۋىمەن باۋىر الماستىرىلدى.

اۋرۋحانادا «Innova 3131IQ GE» انگيوگرافىندا رەنتگەنانگيوگرافيالىق ەمدىك شارالار جاسالىنادى. ماماندار ليتۆانىڭ كاۋناس قالاسىنداعى «ناۋكا زدوروۆيا» ۋنيۆەرسيتەتىندە بىلىكتىلىگىن ارتتىرعان. اتالعان اپپاراتتا 24 سەلەكتيۆتى تسەرەبرالدى انگيوگرافيا، 9 تومەنگى بولىكتەردىڭ ارتەريوگرافياسى، 8 قاپشىقتىق انيەۆريزمانى ميكروسپيرالدارمەن رەنتگەنەندوۆاسكۋليارلىق ەمبوليزاتسيالاۋ، 1 ۇيقى ارتەرياسىنا بالوندىق انگيوپلاستيكامەن رەنتگەنەندوۆاسكۋليارلىق ستەننتەۋ جۇرگىزىلدى.

«Stealth Station S7» نەيروناۆياگاتسيالىق كەشەن الىنعالى 14 رەت باس ميىنا وتا جاسالدى. جۇلىنعا جاسالاتىن وتالاردىڭ ترانسپەديكۋليارلىق كەيدجدەرمەن فيكساتسيالاۋ سياقتى جاڭا تاسىلدەرى ەندىرىلدى. جامباس بۋىندارىن تولىق الماستىرۋ، مالوينۆازيۆتى وستەوسينتەزدىك وتالار جاساۋعا قول جەتكىزىلدى. ارتروسكوپيالىق ەمدەۋ-دياگنوستيكالىق، اتاپ ايتساق الدىڭعى كرەستتىڭ بۋدانى قالپىنا كەلتىرۋ وتالارى جاسالدى. بۇيرەككە لاپوروسكوپيالىق وتالار جانە ءزار جولدارىنىڭ رەكونسترۋكتيۆتىك-پلاستيكالىق وتالارىن جاساۋ جولعا قويىلعان. سونداي-اق رەسپۋبليكادا ءۇشىنشى بولىپ HLA تيپتىك زەرتحاناسى اشىلدى.