نازاربايەۆ ءومىردىڭ ءمانى تۋرالى سۇراققا جاۋاپ بەردى
«مەن از ءومىر سۇرگەن جوقپىن، ياعني ومىرلىك تاجىريبەمە قاراپ، ءومىردىڭ ءمانى تۋرالى ويلاي بەرۋ قۇر بەكەر ءىس. ءومىردىڭ ءمانىن جاراتۋشىمىز تۋعانىمىزدا ءبىزدىڭ گەنىمىزگە سالىپ بەرگەن»، - دەدى نۇرسۇلتان نازاربايەۆ استانانىڭ «جاسىل بەلدەۋىن» قۇرايتىن ورمان القابىن ارالاپ شىققاننان كەيىن ب ا ق وكىلدەرىنە بەرگەن سۇحباتىندا.
مەملەكەت باسشىسى ءومىردىڭ ءمانى جايىندا كوپ ويلانا بەرۋ كەرەك ەمەس ەكەنىن، اتاپ ايتقاندا، قاراپايىم ادام ءۇشىن ءومىردىڭ ءمانى جاقسى ءومىر سۇرۋدە جانە وتان يگىلىگى ءۇشىن ادال ەڭبەك ەتۋدە جاتقاندىعىن جەتكىزدى.
«ءبىز ءارقاشان وتكەنمەن ءومىر سۇرۋدەمىز، ياعني «نەنى دۇرىس ىستەمەدىك؟» دەگەندى ويلاۋمەن بولامىز. نەمەسە، بولاشاقتى ويلاپ، «ون جىلدان كەيىن نە بولادى؟» دەپ ويعا ءتۇسىپ جاتامىز. ال ونى كىم بىلەدى؟» - دەدى ن. نازاربايەۆ.
پرەزيدەنت جەر شارى وتە نازىك ەكەنىن جانە كوپتەگەن قاتەرلەرگە تاپ بولۋى مۇمكىن ەكەندىگىن اتاپ ءوتتى.
«ءبىزدىڭ پلانەتا گالاكتيكانىڭ ءبىر بولىگى عانا. ادامنىڭ باسىنا كەلەتىن نەشە ءتۇرلى بالە بار. ونىڭ بارلىعىن ويلاساڭ، ءومىر سۇرە المايسىڭ. اللا بىزگە جان بەرگەن كەزدە قاشان باقيلىق بولاتىنىمىزدى ەشكىمگە ايتقان جوق. ونى بىلەتىن بولساق، ءومىردىڭ ءوزى سۇمدىق بولار ەدى. بارلىق دىندەردە جاراتۋشى يەمىزگە قۇلشىلىق ەتۋ جايىندا ايتىلعان. وكىنىشكە قاراي، بارلىعى قۇلشىلىقتى ورىنداپ جاتقان جوق. ءومىردىڭ ءمانى - جاقسى ءومىر ءسۇرىپ، جاقىندارىڭ مەن دوستارىڭدى جاقسى كورىپ، وتانىڭدى ءسۇيۋ جانە بالالاردىڭ بولاشاعىنا جاعداي جاساۋ!»، - دەپ تۇيىندەدى ن. نازاربايەۆ.
اۆتور: رۋسلان عابباسوۆ
