ەلباسى استانا ماڭىندا ورمان وتىرعىزۋ ىسىمەن اينالىسىپ جۇرگەن عالىمدار مەن ورمانشىلارعا العىسىن ايتتى
بۇل تۋرالى بۇگىن ەلباسى نۇرسۇلتان نازاربايەۆ استانانىڭ «جاسىل بەلدەۋىن» قۇرايتىن ورمان القابىن ارالاپ شىققاننان كەيىن ب ا ق وكىلدەرىنە بەرگەن سۇحباتىندا ءمالىم ەتتى.
«استانا ماڭىنا جوق بولىپ كەتكەن جانۋارلار قايتادان كەلىپ جاتىر. باياعىدا تىڭ جەرلەردى يگەرەمىز دەپ جەردىڭ باسىم بولىگىن جىرتىپ تاستاعاننان كەيىن قوياندار، ەلىكتەر، قىرعاۋىلدار جوق بولدى. قازىر قايتادان قالپىنا كەلىپ جاتىر. ورماننىڭ ىشىندە جەمىس- جيدەكتەر دە وتىرعىزىلۋدا. وسى جۇمىستاردىڭ بارلىعى حالىقتىڭ يگىلىگى ءۇشىن. بۇگىندە رەسەيلىك جانە باسقا دا ەلدەردىڭ ورمان سالاسىنداعى عالىمدارى ەلوردا توڭىرەگىندەگى «جاسىل بەلدەۋدى» كەرەمەت قۇبىلىسقا باعالاۋدا. سەبەبى، ەن دالادا وسىنداي الىپ ورماندى وتىرعىزۋ بولعان ەمەس»، - دەدى پرەزيدەنت.
ن. نازاربايەۆ ورمان قالانىڭ توڭىرەگىندە 70 مىڭ گەكتارعا جەتكەنىن، ال 2020 - جىلعا دەيىن ونى 100 مىڭ گەكتارعا جەتكىزۋ ماقسات ەتىپ قويىلعاندىعىن اتاپ ءوتتى.
ەلباسى استانا كۇنى قارساڭىندا ءداستۇرلى تۇردە جىل سايىن «جاسىل بەلدەۋ» ورماندارىن ارالايتىندىعىن ايتا كەلە، «جاسىل ەل» باعدارلاماسىمەن جىل سايىن بارشا قازاقستان جاستارىنا «ءارقايسىسىڭ اعاش وتىرعىزىڭدار» دەپ ۇران تاستاپ كەلەمىن. جالپى، ەلىمىزدىڭ بارلىق جەرىنە اعاش وتىرعىزۋعا بولادى»، - دەدى.
سونىمەن قاتار مەملەكەت باسشىسى ەلوردا ماڭىندا ورمان وتىرعىزۋ ىسىمەن اينالىسىپ جۇرگەن ورمانشىلارعا، عالىمدارعا، جۇمىسشىلارعا ءوز العىسىن ءبىلدىردى.
تاراتىلعان مالىمەتتەرگە قاراعاندا، بۇل اۋماقتا 2020 - جىلعا دەيىن ءۇش نەگىزگى باعىت بويىنشا جۇمىس جۇرگىزۋ جوسپارلانۋدا. ءبىرىنشى، ورماندى القاپتا ەگۋ جۇمىستارىن جالعاستىرۋ. ەكىنشى باعىت - قالا اۋماعىنداعى بوس جەرلەردە ورمان القاپتارىن جاساۋ. سونىمەن قاتار ەكسپو-2017 كورمەسىنە دايىندىق اياسىندا ەلوردانىڭ جاسىل بەلدەۋىن دامىتۋ ءۇشىن رەكرەاتسيالىق اۋماقتاردى جاساۋ كوزدەلگەن، بۇل اتالعان جۇمىستىڭ ءۇشىنشى باعىتى بولىپ تابىلادى. قازىرگى كەزدە وسى اۋماقتى جاساۋعا ارنالعان تەحنيكالىق- ەكونوميكالىق نەگىزدەمە ازىرلەندى. وسى ورايدا 25 گەكتار اۋماقتى قۇرايتىن العاشقى جوبادا سپورت كەشەنى، بالالاردىڭ ويىن الاڭدارى، مەيرامحانا، 320 كولىككە ارنالعان اۆتو تۇراق قۇرىلىسى قاراستىرىلعان. ال 100 گەكتار قۇرايتىن ەكىنشى اۋماقتا ات سپورتى كەشەنىن ورنالاستىرۋ جوسپارلانۋدا. وندا وتباسىلىق دەمالىس ورتالىعى، اكۆاپارك، 288 ورىندىق بالالار لاگەرى، جاستار دەمالىس ورتالىعى بولادى.
اۆتور: قانات مامەتقازى ۇلى
