گەرمانيادا «ۇلكەن جەتىلىك» ەلدەرى باسشىلارىنىڭ كەزدەسۋى ءوتىپ جاتىر
بۇگىن، ءسامميتتىڭ ەكىنشى كۇنى باتىستىڭ ەكونوميكاسى دامىعان التى ەلى ا ق ش، ۇلى بريتانيا، فرانسيا، گەرمانيا، كانادا، يتاليا مەن جاپونيا باسشىلارى ۋكرايناداعى جاعداي، «يسلام مەملەكەتى» ەكسترەميستىك توبىمەن كۇرەس جانە حالىقارالىق ەكونوميكالىق ماسەلەلەردى تالقىلاماق. بۇل سامميتكە رەسەي شاقىرىلماعان.
كەشە سامميت قارساڭىندا ا ق ش پرەزيدەنتى باراك وباما گەرمانيا كانسلەرى انگەلا مەركەلمەن جانە ۇلى بريتانيا پرەمەر- ءمينيسترى ديەۆيد كەمەرونمەن جەكە- جەكە كەزدەسكەن.
ۇلى بريتانيا پرەمەرىمەن كەزدەسۋى الدىندا وباما «جاقسى دوس ءارى سەرىگى» كەمەروندى سايلاۋداعى جەڭىسىمەن قۇتتىقتاعانىن مالىمدەگەن. ول كەزدەسۋدە ۋكرايناداعى داعدارىس مەن رەسەيگە قارسى سانكسيانى قولداۋدىڭ ماڭىزدىلىعى جونىندە ايتقان. وباما ۋكراينا داعدارىسىن ءالى دە بەيبىت، ديپلوماتيالىق جولمەن شەشۋگە بولادى دەگەن پىكىردە ەكەنىن ايتىپ، ا ق ش پەن ونىڭ ەۋروپاداعى وداقتاستارى «مۇقيات» بولۋى قاجەتىن بىلدىرگەن.
اق ءۇيدىڭ باسپا ءسوز قىزمەتىنىڭ حابارلاۋىنشا، باراك وباما مەن انگەلا مەركەل رەسەيگە قارسى ەكونوميكالىق سانكسيالار مينسكىدە جاسالعان دونباسستاعى قاقتىعىستى توقتاتۋ كەلىسىمى تولىق ورىندالعانشا جانە ماسكەۋ ۋكراينانىڭ ەگەمەندىگىن قۇرمەت كورسەتپەيىنشە كۇشىندە قالۋى ءتيىس دەپ ۋاعدالاسقان.
سامميتتە سويلەگەن انگەلا مەركەل ماسكەۋ ۋكرايناداعى ارەكەتى ءۇشىن G7-دەن «اۋلاق تۇرۋى ءتيىس» دەپ مالىمدەگەن.
«ازاتتىق»
