ەير استانا بىشكەك اۋەجايىنان شولپان- اتا قالاسىنا دەيىن جولاۋشىلاردى تەگىن تاسىمالدايدى

استانا. قازاقپارات - «ەير استانا» اۋە كومپانياسى ءوز قىزمەتىن پايدالاناتىن جولاۋشىلار ءۇشىن تەگىن تاسىمالداۋ قىزمەتىن ۇسىندى. بۇل تۋرالى اۋە كومپانياسىنىڭ فەيسبۋك جەلىسىندەگى پاراقشاسىندا حابارلانعان.

«ەير استانا» اۋە كومپانياسى 2015 -جىلدىڭ 2 - شىلدەسىنەن 31 - تامىزىنا دەيىن الماتى/استانا - بىشكەك باعىتتارىنداعى رەيستەردىڭ بارلىق جولاۋشىلارىنا بىشكەك اۋەجايىنان شولپان- اتا قالاسىنا دەيىن تەگىن تاسىمالداۋ قىزمەتىن ۇسىناتىنىن قۋانا حابارلايدى. جايلى جولاۋشى اۆتوبۋستارى بىشكەك اۋەجايى مەن شولپان- اتا قالاسى اراسىندا اپتاسىنا 4 رەت قاتىنايتىن بولادى» ، دەلىنگەن حابارلامادا.

سونداي- اق حابارلامادا تاسىمالداۋ قىزمەتىنە وتىنىشتەر جوسپارلانعان ۇشۋ كۇنىنە دەيىن كەم دەگەندە 72 ساعات بۇرىن بەرىلۋ كەرەكتىگى ايتىلعان.