رەسەيدە جارىق كورەتىن «ومبى قازاقتارى» گازەتى قانداستارىمىزدىڭ اراسىندا زور سۇرانىسقا يە - فوتو

استانا. قازاقپارات - وسىدان بەس جىل بۇرىن «ومبى قازاقتارى» قاۋىمداستىعى رەسەيدە «اتامەكەن» (مالايا رودينا) گازەتىن شىعارعان بولاتىن. بۇل جاڭالىقتى رەسپۋبليكالىق ب ا ق سۇيىنشىلەپ جەتكىزگەن ەدى.

گازەت بۇكىل رەسەيدە رەسمي تىركەلگەن تۇڭعىش قازاق باسىلىمى بولدى.

ارينە، ماسكەۋدە، استراحاندا، سامارا مەن ساراتوۆتا وسى سىندى گازەتتەردىڭ جارىق كورەتىنى ءمالىم. دەگەنمەن، بۇل گازەتتەر رەسمي تىركەۋدەن وتپەگەن ەدى. الايدا، وكىنىشكە وراي، بۇل قۋانىشىمىز ۇزاققا سوزىلمادى. اتالعان گازەت قارجى ماسەلەسىنە بايلانىستى جابىلىپ قالدى.

ايتسە دە ومبىداعى قازاق جاستارى بۇل ماسەلەنى شەشۋگە تىرىستى. قازاق حالقىنىڭ ادەبيەتىمەن سۋسىنداتىپ، ادەت-عۇرپى مەن ءداستۇرىن ۇلىقتاۋدى ماقسات ەتكەن «ومبى قازاقتارى» قاۋىمداستىعى 2014-جىلدىڭ ناۋرىز ايىندا ومبى وبلىسىنىڭ ايماقتىق قازاق ۇلتتىق-مادەني اۆتونومياسىنىڭ قولداۋىمەن «ومبى قازاقتارى» باسىلىمىن جارىققا شىعاردى.

«باسىلىمعا ات قويۋ كەزىندە ءبىز كوپ ويلاندىق، - دەپ ويىمەن ءبولىستى گازەتتىڭ باس رەداكتورى تورعىن اشەنوۆا. - ۇسىنىستار ءار ءتۇرلى بولدى، دوستىق، اتامەكەن، ت. ب. اتاۋلار ۇسىنىلدى. ءبىز اقىلداسا كەلە «ومبى قازاقتارى» دەگەن اتاۋعا توقتادىق.

قازىر ءبىزدىڭ باسىلىمنىڭ 11 مىڭنان استام وقىرمانى بار. گازەتىمىزدىڭ العاشقى سانىن ارنايى ىرىمداپ، قازاقتىڭ «ناۋرىز» مەرەكەسىندە تانىستىردىق»، - دەيدى ول.

تورعىن اشەنوۆانىڭ ايتۋىنشا، گازەت «رەداكسياعا حات»، «ابايدىڭ قارا سوزدەرى»، «اۋىلىم مەنىڭ»، «قازاق ەسىمدەرى» سىندى ايدارلارمەن قازاق جانە ورىس تىلدەرىندە شىعادى.

«العاشىندا گازەت 999 دانا بولىپ باسىلعان ەدى. سەبەبى، تيراج مىڭنان اسسا رەسمي تىركەلۋ كەرەك بولادى. گازەتتىڭ ءار سانى جارىق كورگەن سايىن ءبىز ونىڭ ولكەمىزدەگى 100 مىڭنان اسا قازاق ءۇشىن وتە از ەكەنىن تۇسىندىك. 2014-جىلدىڭ قازان ايىندا رەسمي تىركەۋدەن ءوتىپ، تيراجىمىزدى 2 مىڭعا دەيىن كوبەيتتىك، ال قازىر 3 مىڭ دانامەن اي سايىن جارىق كورۋدە. ءبىز بۇل باسىلىمدا ومبىداعى قازاقتاردىڭ ۇلتتىق سانا-سەزىمىن وياتىپ، مادەنيەتى مەن ادەبيەتىمەن تانىستىراتىن ماقالالار جاريالايمىز. قازاقستاندا بولىپ جاتقان جاڭالىقتارمەن ءبولىسىپ وتىرامىز. كەيبىر تۇراقتى وقىرماندارىمىز، اتا-اجەلەرىمىز دە وسى باسىلىم ارقىلى ءوز وي-پىكىرلەرىن ورتاعا سالىپ جاتادى. گازەتىمىزدىڭ قازاقتار اراسىندا عانا ەمەس، باسقا ۇلت وكىلدەرى اراسىندا سۇرانىسقا يە بولىپ وتىرعاندىعى ءبىزدى قۋانتادى»، - دەيدى باسىلىمنىڭ باس رەداكتورى.

«گازەت - حالىقتىڭ كوزى، قۇلاعى ءھام ءتىلى»، - دەپ احمەت بايتۇرسىنوۆ ايتقانداي، شەت جەردەگى قانداستارىمىزدىڭ انا ءتىلىن، ءدىلىن ۇمىتتىرمايتىن، ۇلتتىق رۋحپەن سۋسىنداتىپ وتىراتىن وسىنداي باسىلىمدارىمىز كوپ بولا بەرسىن دەپ تىلەيىك.

گۇلدەن وسپانوۆا