اقتوبە وبلىسى اۋىلشارۋاشىلىق باسقارماسى ءۇي جانۋارلارىنىڭ جاپپاي قىرىلۋ فاكتىلەرىن جوققا شىعارىپ وتىر

اقتوبە. قازاقپارات - وبلىستىق اۋىل شارۋاشىلىعى باسقارماسىنىڭ باسشىلىعى ايتەكە بي جانە ىرعىز اۋداندارىندا، بۇعان دەيىن كيىكتەردىڭ جاپپاي قىرىلۋى تىركەلگەن ورىنداردا ءۇي جانۋارلارىنىڭ قىرىلۋى تۋرالى اقپاراتقا تۇسىنىكتەمە بەرىپ ءوتتى.

بۇگىن بولىپ وتكەن بريفينگ كەزىندە وبلىستىق اۋىل شارۋاشىلىعى باسقارماسى باسشىسىنىڭ ورىنباسارى قۇسايىن سارسەنبايدىڭ ايتۋىنشا، ءۇي جانۋارلارىنىڭ جاپپاي قىرىلۋ فاكتىلەرى راستالماي وتىر.

ونىڭ ايتۋىنشا، ايتەكە ءبي اۋدانىنداعى «قۇمقۇدىق» ج ش س- دە 29 جىلقىنىڭ قىرىلۋى - سوڭعى 4 ايدا بولعان مالىمەتتەر. مامىر ايىنىڭ سوڭىنان باستاپ ايتەكە ءبي اۋدانىنىڭ ءۇش وكرۋگىندە 12 جىلقى مەن 11 ءىرى قارا مال قىرىلعان. ىرعىز اۋدانىندا 3 جىلقى مەن 20 ءىرى قارا، سونىڭ ىشىندە 18 بۇزاۋ ولگەن. جانۋارلاردىڭ قىرىلۋ فاكتىلەرى اۋدان ورتالىعىندا، سونداي-اق جايساڭباي، قۇمتوعاي جانە امانگەلدى اۋىلدارىندا تىركەلىپ وتىر. ازىرگە مالداردىڭ قىرىلۋىن ايماقتاعى كيىكتەردىڭ ولىمىمەن بايلانىستىرماي وتىر.

«ولگەن جانۋارلاردىڭ پاتماتەريالى الىنىپ، وبلىستىق زەرتحاناعا جەتكىزىلگەن، تالداۋ قورىتىندىلارى 7-10 كۇننىڭ ىشىندە دايىن بولادى»، - دەپ حابارلادى قۇسايىن سارسەنباي.

قۇسايىن سارسەنباي زەرتحانا قورىتىندىلارى مەن ساراپشىلاردىڭ تۇيىندەرىن كۇتۋدى سۇرايدى. ول سونداي- اق جوعارىدا اتالعان ەكى اۋداننان اقپارات ساعات سايىن ءتۇسىپ وتىرعانىن اتاپ ءوتتى. 5 -ماۋسىمنان باستاپ ءۇي جانۋارلارىنىڭ قىرىلۋى تۋرالى مالىمەتتەر بولعان جوق. «جاعداي باقىلاۋعا الىنعان»، - دەپ سەندىردى وبلىستىق اۋىل شارۋاشىلىعى باسقارماسى باسشىسىنىڭ ورىنباسارى.