ب. ساعىنتايەۆ كيىكتەر قىرىلعان كەسەلدىڭ الدىن الماعان مينيسترلىكتەردى سىنعا الدى

استانا. قازاقپارات - كيىكتەردىڭ جاپپاي قىرىلۋىنا تاعى دا پاستەرەللەز اۋرۋى سەبەپ بولعان. ۇكىمەتتە دالا جانۋارلارىنىڭ ولىمىنە قاتىستى وتكەن جيىندا ماماندار وسىنداي قورىتىندى جاسادى. دەگەنمەن بۇل الدىن الا جاسالعان شەشىم.

سوڭعى ساراپتاما 1 ايدان سوڭ ءمالىم بولادى. ماماندار بوكەندەردىڭ ولىمىنە گەپتيل مەن پروتوننىڭ ەش قاتىسى جوق دەپ وتىر. الايدا كەڭەسكە قاتىسقان كەيبىر قوعامدىق ۇيىمدار: «كيىكتەردى تەك پاستەرەلەزدەن قىرىلدى دەپ ايتۋ اسىعىستىق»، -  دەپ ەسەپتەيدى.

ولاردىڭ ايتۋىنشا، كەز كەلگەن جابايى جانۋاردا پاستەرەللەزدىڭ بەلگىلەرى بار. «ءبىراق ولاردىڭ ءبارى جاپپاي قىرىلىپ جاتقان جوق. سوندىقتان باسقا سەبەپتەرىن قاراستىرۋ كەرەك»، -  دەيدى.

ەڭ سوراقىسى وسىنداي جاعدايلاردىڭ الدىن الۋ ءۇشىن 3 جىل بۇرىن ءبىلىم جانە عىلىم مينيسترلىگى جانىنداعى زەرتتەۋ ينستيتۋتىنا 300 ميلليون تەڭگە بولىنگەن. الايدا مۇنداي ورتالىقتىڭ بارىنان باسقا ەمەس اۋىل شارۋاشىلىعى ءمينيسترىنىڭ ءوزى دە بەيحابار بولىپ شىقتى. 2 مينيسترلىكتىڭ ءوز بەتىنشە ارەكەت ەتۋىنىڭ سالدارىنان بيۋدجەت قارجىسى ءتيىمسىز جۇمسالعان. سالدارىنان 113 مىڭ كيىك ارام ءولدى.

بۇل ەلىمىزدەگى اقبوكەندەردىڭ تەڭ جارتىسى. جاۋاپتى ورگانداردىڭ مۇنداي جاۋاپسىزدىعىنا جيىنعا ءتوراعالىق ەتكەن ءبىرىنشى ۆيتسە-پرەمەر باقىتجان ساعىنتايەۆ ءوز قىنجىلىسىن ءبىلدىردى.

باقىتجان ساعىنتايەۆ، ق ر پرەمەر-ءمينيسترىنىڭ ءبىرىنشى ورىنباسارى:

- مەنىڭ ايتىپ وتىرعانىم، مونيتورينگ بولسىن، باسقا بولسىن، ءبىراق جانى اشيتىن ازامات بولسا، ەلىم، جەرىم دەيتىن بولسا، كورگەن نارسەسىن ول شىرىلداپ تۇرىپ ايتۋ كەرەك. «مەن مىناداي جاعدايدى انىقتادىم، كورىپ جاتىرمىن، اعايىندار، قاراڭدار مىنانى، مىناداي جاعداي بولىپ جاتىر»، -  دەپ. «اقبوكەندەر قىرىلىپ جاتىر، مەنىڭ مىنا عىلىمي ەڭبەكتەرىمدى قاراڭدار»، -  دەپ شىرىلداۋ كەرەك. «سونى نەگە ايتپادىڭ؟»، -  دەپ ايتىپ وتىرمىن مەن.

www.khabar.kz