الماتىلىق ايەل ەسىموۆتىڭ تانىسىمىن دەپ اكىمدىكتە قىزمەت ورنىن ساۋدالاعان
بۇل تۋرالى Tengrinews.kz تىلشىسىنە سوتتالۋشىنىڭ مۇددەسىن قورعاۋشى ادۆوكات عالىم نۇرپەيىسوۆ حابارلادى.
ايتا كەتەيىك، قازىرگى ۋاقىتتا سوتتا ايەل قالا باسشىسىنىڭ قىزىمەن تانىس ەكەنىن مويىندامايدى جانە اكىمنىڭ وزىنەن كەشىرىم سۇراپ، حات جازدى.
وسىعان بايلانىستى ءىس قالالىق مامانداندىرىلعان قىلمىستىق ىستەر جونىندەگى سوتتا ءوتىپ جاتىر. 1978 -جىلعى الماتىلىق ايەل «الاياقتىق» جانە «پارا بەرۋ» باپتارى بويىنشا ايىپتالىپ وتىر. ءىس ماتەريالدارىنا نەگىزدەلگەن ادۆوكاتتىڭ مالىمەتىنشە، 2014 -جىلدىڭ جەلتوقسان ايىندا سوتتالۋشىعا 1982 -جىلعى تانىس قۇربىسى حابارلاسىپ، اكىمدىككە جۇمىسقا تۇرعىزىپ بەرۋدى، ناقتىراق ايتساق، تابيعي مونوپوليالاردى رەتتەۋ دەپارتامەنتىنىڭ باسشىسى قىزمەتىنە تۇرعىزىپ بەرۋدى وتىنگەن.
ءوز كەزەگىندە سوتتالۋشى ونىڭ ءوتىنىشىن ورىنداي الاتىنىن ايتقان، سەبەبى ول قالا اكىمىنىڭ قىزىمەن تانىس دەلىندى. الايدا بۇل ءۇشىن ول ءوز قۇربىسىنان 70 مىڭ دوللار سۇرايدى، بۇل قارجى قىزى ارقىلى اكىمنىڭ وزىنە بارىپ ءتۇسۋى كەرەك بولدى دەلىنەدى. كەيىن ولار 50 مىڭ دوللارعا كەلىسەدى.
كەلىسسوزدەردەن كەيىن سوتتالۋشىدان كومەك سۇراپ بارعان ايەل مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنە 1978 -جىلعى ايەلدىڭ ودان 50 مىڭ دوللار اقشا بوپسالاعانىن جازعان. 2015 -جىلدىڭ 15 -قاڭتارىندا ايەل 50 مىڭ دوللار كولەمىندەگى قاراجاتتى الۋ ۇستىندە ۇستالادى. ءىس ماتەريالدارىندا سوتتالۋشىنىڭ ەسىموۆتىڭ قىزىمەن تانىستىعى ارقىلى اكىمدىككە جۇمىسقا تۇرعىزا الاتىنى جازىلىپ قالعان ءتورت اۋديوجازبا بار. فونەتيكالىق ساراپتاما سويلەۋشىلەردىڭ داۋىسىنىڭ سايكەس كەلەتىنىن انىقتادى.
ءبىراق ادۆوكات نۇرپەيىسوۆ ايىپتاۋ بابىمەن كەلىسپەيدى.
«ءبىز بۇل ءىستى تەك «الاياقتىق» بابى بويىنشا ءجۇرۋى كەرەك دەپ ەسەپتەيمىز، «پارا بەرۋ» بابى بولماۋى كەرەك، سەبەبى سوتتالۋشى اقشانى بىرەۋگە بەرۋدى جوسپارلاماعانىن ايتىپ جاتىر»، - دەدى ادۆوكات نۇرپەيىسوۆ.
