ق ر مادەنيەتى جانە سپورت مينيسترلىگىنىڭ جاۋاپتى حاتشىسى مەن ۆيتسە-مينيسترلەرى مەملەكەتتىك ءتىل سىناعىنان وتۋدە

استانا. قازاقپارات - بۇگىن ق ر مادەنيەتى جانە سپورت مينيسترلىگىنىڭ بارلىق قۇرىلىمدىق بولىمشەلەرى مەن ۆەدومستۆولىق باعىنىشتى مەكەمەلەرىنىڭ قىزمەتكەرلەرى مەملەكەتتىك ءتىلدى مەڭگەرۋ دەڭگەيىن باعالاۋ سىناعىن تاپسىرۋعا كىرىستى.

تەست تاپسىرۋشىلاردىڭ قاتارىندا مينيسترلىكتىڭ جاۋاپتى حاتشىسى قۋاتجان ۋاليەۆ جانە ۆيتسە- مينيسترلەرى مارات ءازىلحانوۆ مەن عالىم احمەدياروۆ بار.

«تىلدەردى دامىتۋ مەن قولدانۋدىڭ 2020 -جىلعا دەيىنگى باعدارلاماسى اياسىندا ءىس-شارالار ودان ارى جالعاسۋدا. مەملەكەتتىك باعدارلامانىڭ نەگىزگى بولىگىنىڭ ءبىرى - مەملەكەتتىك ءتىلدى مەڭگەرۋ. ونىڭ نەگىزى قۇرالى «قازتەست» جۇيەسى بولىپ تابىلادى. ول وتە ساپالى دايىندالعان 5 دەڭگەيلى جۇيە. وزدەرىڭىزگە ءمالىم، «ا» كورپۋسى دەڭگەيىندەگى قىزمەتكەرلەر قىزمەتكە قابىلدانۋى ءۇشىن مەملەكەتتىك ءتىلدى مەڭگەرۋىن انىقتاۋ تەستىنەن وتەدى»، - دەدى ول.

ۆيتسە-ءمينيستردىڭ اتاپ وتۋىنشە، بارلىق مەملەكەتتىك ورگانداردا دياگنوستيكالىق تەستىلەۋ ارقىلى مەملەكەتتىك ءتىلدى مەڭگەرۋ دەڭگەيىن انىقتاۋ جۇرگىزىلەدى. بۇل رەتتە مادەنيەت جانە سپورت مينيسترلىگى بۇل جۇمىستاردى ەڭ ءبىرىنشى بولىپ قولعا الۋدا.

«قازىر ءبىزدىڭ ورتالىق اپپاراتتا 200 گە جۋىق قىزمەتكەر وسى دياگنوستيكادان ءوتىپ بولدى. سونىمەن بىرگە بىزگە قاراستى باسقا ورتالىقتار، مەكەمەلەردىڭ دە 8 مىڭنان استام قىزمەتكەرى وسى تەستەن وتۋدە. ءبىزدىڭ ماقساتىمىز - ءار قىزمەتكەردىڭ مەملەكەتتىك ءتىلدى ءبىلۋ دەڭگەيىن انىقتاۋ جانە تولىق مەڭگەرمەگەن ازاماتتارمەن وقىتۋ جۇمىستارىن جالعاستىرۋ»، - دەدى م. ءازىلحانوۆ.

ونىڭ اتاپ وتۋىنشە، مينيسترلىك قىزمەتكەرلەرىنىڭ «قازتەست» ناتيجەسى ماۋسىم ايىندا شىعارىلاتىن بولادى.

اۆتور: مارلان جيەمباي