قازاقستان ەلشىسى شىمكەنتتەن بالا اسىراپ العان اعىلشىن وتباسىمەن كەزدەستى
«2-3 -ماۋسىمدا قازاقستاننىڭ ۇلى بريتانياداعى ەلشىسى ەرجان قازىحانوۆ ۋەلسكە ساپار شەكتى. ساپار بارىسىندا ەلشى قازىحانوۆ شىمكەنتتىك ارمان ەسىمدى بالانى اسىراپ العان اعىلشىن پول جانە سارا ەلليوتتار وتباسىمەن دە كەزدەستى، - دەلىنگەن حابارلامادا.
ساپار بارىسىندا قازىحانوۆ كارديفف قالاسىنىڭ مەرىمەن، ۋەلس ۇلتتىق اسسامبلەياسى ءتوراعاسىنىڭ ورىنباسارىمەن، ۋەلس ۇكىمەتىنىڭ بيزنەس، ەكونوميكالىق عىلىمدار جانە كولىك باسقارماسىنىڭ ديرەكتورىمەن، سونداي-اق اكادەميالىق جانە ىسكەرلىك توپتار وكىلدەرىمەن كەزدەسۋلەر وتكىزدى. سونىمەن بىرگە، ەلشى كارديفف ۋنيۆەرسيتەتىنىڭ مەديتسينا مەكتەبى ونكولوگيا جانە گەنەتيكا ينستيتۋتىنىڭ پروفەسسورىمەن جانە ءۋەلستىڭ جوعارى وقۋ ورىندارىندا وقيتىن قازاقستاندىق ستۋدەنتتەرمەن كەزدەستى.
«ۋەلس باسشىلىعىنىڭ جانە ىسكەرلىك توپتارىنىڭ وكىلدەرى ماڭىزدى رەفورمالار مەن ءتيىمدى الەۋمەتتىك جانە ەكونوميكالىق ساياسات جۇرگىزىپ جاتقان ءبىزدىڭ ەلىمىزدىڭ ورتالىق ازياداعى جەتەكشى ءرولىن اتاپ ءوتتى. قازاقستاننىڭ ءوز ەكونوميكاسىن جاڭارتۋداعى جانە جوعارى تەحنولوگيالاردى تارتۋداعى كۇش- جىگەرىنە نازار اۋدارعان ۋەلستىك ءبىرقاتار كومپانيا قازاقستاندىق ونەركاسىپتىڭ ءتۇرلى سالالارىندا ناقتىلى ينۆەستيتسيالىق جوبالاردى جۇزەگە اسىرۋعا قىزىعۋشىلىق تانىتتى»، - دەلىنگەن حابارلامادا.
سىرتقى ساياسات ۆەدومستۆونىڭ باسپا ءسوز وكىلدەرىنىڭ حابارلاۋىنشا، ەلشى قازىحانوۆتىڭ ۋەلسكە ساپارى سىندارلى جانە دوستىق احۋالىندا ءوتتى. حابارلامادا ساپاردىڭ قازاقستان مەن ۋەلس كنيازدىعى اراسىنداعى ىنتىماقتاستىقتى كەڭەيتۋگە نەگىز بولعانى ايتىلادى.
