قالاماقى باسپانىڭ قانجىعاسىن مايلاماي، قالامگەردىڭ قالتاسىنا ءتۇسۋى ءتيىس - ن. ورازالين
بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا مەن ەلىمىزدىڭ بەلگىلى قالامگەرلەرى اراسىنداعى كەزدەسۋ الدىندا ق ر پارلامەنتى ءماجىلىسىنىڭ دەپۋتاتى، اقىن نۇرلان ورازالين وسىنداي پىكىر ءبىلدىردى.
«ءبىز مەملەكەت رەتىندەگى قوعامدىق دامۋدىڭ جاڭا ساتىسىنا كوتەرىلىپ وتىرعان ەلمىز. 90- جىلدارى العاشقى تاۋەلسىزدىك جاريالاعان كەزەڭدەگى قازاق ەلىنىڭ اقيقاتى مەن 2000- جىلدارداعى اقيقاتتى سالىستىرۋعا كەلمەيدى. ويتكەنى، ءبىز تاۋەلسىزدىك جاريالاعان كەزدە قازاق حالقى مەملەكەت بولا ما، بولماي ما، دەگەن ءارتۇرلى الىپ-قاشپا اڭگىمەلەر كوپ بولدى. ءبىراق، 2000- جىلدارعا قاراي قازاق ەلى، قازاق حالقى مەملەكەت قۇرۋعا قابىلەتى زور ەكەندىگىن دالەلدەدى. ال ەندى دامۋدىڭ ءۇشىنشى كەزەڭىنە ءوتىپ وتىرمىز»، - دەدى ول.
ونىڭ اتاپ وتۋىنشە، ەلباسى ن. نازاربايەۆ 90- جىلداردان بەرگى شيرەك عاسىرعا جۋىق ۋاقىتتىڭ ىشىندە ەلىمىزدىڭ تۇتاستىعىن الەم الدىندا دالەلدەپ، مەملەكەتىمىزدى دامۋدىڭ جاڭا كەزەڭىنە وتكىزدى. «ماڭگىلىك ەل» دەپ اتالاتىن ۇلى جوبانى حالقىمىزعا مەجەلى ماقسات رەتىندە ايقىنداپ بەردى.
«ال ادەبيەتىمىز دە قوعامنىڭ قوزعاۋشى كۇشى رەتىندە ءوز دامۋىنىڭ جاڭا ساتىسىنا ءوتىپ وتىر. بۇرىنعىداي ەسكىشە جازۋدىڭ زامانى ءوتىپ بارا جاتىر. جاڭاشا جازۋ ءبىراز قيىندىقتار تۋىنداتادى»، - دەپ اتاپ ءوتتى ن. ورازالين.
ونىڭ ايتۋىنشا، ۋاقىت، زامانا تالابىنا ساي شىعارمالاردى قالاي جانە قاي باعىتتا جازۋ كەرەك دەگەن ساۋال قوعامدا دا، جازۋشىلار ورتاسىندا دا وزەكتى بولىپ وتىر. «ەڭ الدىمەن ادەبي بايلانىستاردى قايتا جانداندىرۋىمىز قاجەت. ادەبيەتىمىزدىڭ بار ەكەندىگىن الەمدىك دەڭگەيدە تانىتاتىن قيمىل- ارەكەت جاساۋىمىز كەرەك. ونى قۇقىقتىق تۇرعىدا بەكىتكەنىمىز ءجون. تاعى ءبىر ۇلكەن ماسەلە - قالاماقى. ول وتەۋلى بولۋى كەرەك جانە ول باسپالاردىڭ قانجىعاسىندا كەتپەۋى ءتيىس»، - دەدى ول.
اۆتور: مارلان جيەمباي
