ق ر مەملەكەتتىك حاتشىسى گ. ءابدىقالىقوۆا بەلگىلى قازاق قالامگەرلەرىمەن جۇزدەستى

استانا. قازاقپارات - بۇگىن اقوردادا ق ر مەملەكەتتىك حاتشىسى گۇلشارا ءابدىقالىقوۆا ەلىمىزدىڭ بەلگىلى قالامگەرلەرىمەن كەزدەستى.

«كول جاعاسىز، ەل اعاسىز بولمايدى، دەگەندەي سىزدەر اۋىزى دۋالى، ءسوزى ءۋالى اعالارىمىزسىزدار. قازىر بارلىق شىعارمالارىڭىزدى ايتپاعانمەن اكىم اعامىزدىڭ (ءا. تارازي) «جازا» رومانى، انەس (ءا. ساراي) اعامىزدىڭ «ەسىل-جايىق» رومانى، دۋلات اعامىزدىڭ (د. يسابەكوۆ) «قارعىن» رومانى، ءسابيت اعامىزدىڭ (س. دوسانوۆ) «20 -عاسىر» رومانى، نۇرلان اعامىزدىڭ (ن. ورازالين) «عاسىرمەن قوشتاسۋ» اتتى جيناقتارى ءبىزدىڭ التىن بايلىعىمىز. سوندىقتان سىزدەرمەن جازۋشى رەتىندە عانا ەمەس، تۇلعا، قوعام قايراتكەرلەرى رەتىندە كەزدەسىپ، پىكىر الىسقىمىز كەلىپ وتىر»، - دەدى كەزدەسۋدى اشقان مەملەكەتتىك حاتشى.

سونىمەن قاتار ول اعىمداعى جىلى قازاقستان حالقى اسسامبلەياسىنىڭ، ەل كونستيتۋتسيانىڭ 20، ۇلى وتان سوعىسىنداعى جەڭىستىڭ 70، قازاق حاندىعىنىڭ 550 جىلدىق مەرەيتويلارى اتالىپ وتىلەتىن جىل ەكەندىگىن ەسكە سالىپ ءوتتى.

«وزدەرىڭىز وسى تاقىرىپتاردا شىعارمالار جازىپ، پىكىر الماسىپ جۇرسىزدەر.  ۇلىتاۋداعى ەلباسىمىزدىڭ بەرگەن ۇلكەن سۇحباتىنا دا پىكىرلەرىڭىزدى بىلدىردىڭىزدەر. جاقىندا عانا پرەزيدەنت سايلاۋى بولدى. بۇل سايلاۋعا دا وزدەرىڭىز اتسالىستىڭىزدار، ەل بىرلىگىن كورسەتتى»، - دەدى گ. ءابدىقالىقوۆا.

كەزدەسۋگە نۇرلان ورازالين، اكىم تارازي، دۋلات يسابەكوۆ، انەس ساراي، ءسابيت دوسانوۆ قاتىسىپ، ونىڭ بارىسىندا اۆتورلىق قۇقىق، قالاماقى تولەۋ سىندى ماسەلەلەر جان-جاقتى تالقىعا ءتۇستى.

اۆتور: مارلان جيەمباي