يراك بوكس قۇراماسىنىڭ باپكەرى - قازاق

استانا. قازاقپارات -  بوكستان اتلانتا وليمپياداسىنىڭ قولا جۇلدەگەرى بولات نيازىمبەتوۆ ءبىر ايدان بەرى يراك بوكس قۇراماسىن جاتتىقتىرىپ ءجۇر. ول «ازاتتىققا»  يراكتاعى قىزمەتى جانە العاشقى اسەرلەرى تۋرالى ايتتى.

بولات نيازىمبەتوۆ 1994 - جىلى تەگەراندا، 1995 - جىلى تاشكەنتتە وتكەن ازيا چەمپيوناتىندا 63 كيلوگرام سالماقتا التىن العان. ول - 1994 - جىلعى حيروسيماداعى ازيا ويىندارىنىڭ قولا جۇلدەگەرى. بوكسشى 1996 -جىلى اتلانتا وليمپياداسىندا قولا مەدال يەلەنگەن ەدى.

سپورتتان كەتكەن سوڭ ءبىراز جىل قۇقىق قورعاۋ ورگاندارىندا جۇمىس ىستەگەن بولات نيازىمبەتوۆ كەيىن جاتتىقتىرۋشىلىقپەن اينالىسا باستادى. قازاقستان جاسوسپىرىم قىزدار قۇراماسىنىڭ، «استانا ارلاندارى» بوكس كلۋبىنىڭ باپكەرى بولعان. سوڭعى ءۇش جىلدان بەرى ول شەتەلدە قىزمەت اتقارىپ ءجۇر.

- يراك قۇراماسىنا قالاي شاقىرتۋ الدىڭىز؟

- يراك قۇراماسىن بۇرىن جاتتىقتىرعان قازاقستاندىق مامان دامير بۋدانبەكوۆ كەلىسىم- شارتىن اياقتاپ، ۇرىمجىگە كەتكەننەن كەيىن يراك بوكس فەدەراتسياسى مەنى شاقىردى. كەلىسىم- شارتقا وتىرعانىما ءبىر اي بولدى. قازىر تۇركيانىڭ انتاليا قالاسىندا جاتتىعۋ جيىنىن وتكىزىپ جاتىرمىز.

- كەلىسىم- شارت بويىنشا سىزگە قانداي ماقسات قويىپ وتىر؟

- كەلىسىم- شارتىم ءبىر جىلعا ەسەپتەلگەن. باستى ماقسات - يراك بوكسىنىڭ دەڭگەيىن كوتەرۋ. الدا كاتاردىڭ دوحا قالاسىندا وتەتىن اراب ويىندارىنا دايىندالىپ جاتىرمىز. ودان كەيىن 2-12 - ماۋسىم ارالىعىندا تايلاندا وتەتىن ازيا چەمپيوناتىنا، كۇزدە كاتاردا بولاتىن الەم چەمپيوناتىنا بارامىز.

- يراكتاعى ساياسي جاعداي قالاي؟ جاتتىعۋعا كەدەرگى كەلتىرىپ جاتقان جوق پا؟

- يراك ەلىندە بوكسپەن اينالىساتىن جاستار وتە كوپ. بۇل ەلدىڭ ماقساتى - بوكستى ەلدەگى باستى سپورتقا اينالدىرۋ. ماعان جۇمىس جاساۋعا، بوكسشىلارعا جاتتىعۋعا بارلىق جاعداي جاسالعان. ازىرگە جارىلىس نەمەسە قالا ورتالىعىنداعى وقىس وقيعالاردى كورگەن جوقپىن. ءبىراق بۇل ەلدەگى ساياسي جاعدايعا بايلانىستى وتباسىمدى مۇندا اكەلمەدىم، ولار الماتىدا قالدى.

 بوكس بازاسى باعداتتاعى تىنىش ءارى قاۋىپسىز ايماقتا ورنالاسقان. كۇزەتى دە مىقتى. قازىر جاستار مەن ەرەسەكتەردى دە جاتتىقتىرامىن. اۋدارماشى بار، اراب ءتىلىن دە ۇيرەنىپ ءجۇرمىن. قازىر يراك ۇلتتىق قۇراماسىندا ءىرى جارىستارعا باراتىن جەتى بوكسشى بار. ەل جانكۇيەرلەرى سولاردان كوپ ءۇمىت كۇتەدى.

- يراك ەلى تۋرالى العاشقى اسەرىڭىز قانداي؟

- قازىر جۇمىس قاربالاس. اراب ويىندارىندا جۇلدە الساق دەگەن ماقساتپەن كۇنىمىز جاتتىعۋمەن ءوتىپ جاتىر. انتالياداعى جاتتىعۋ اياقتالا سالا كاتارعا بارامىز. ەلگە اراب ويىندارى اياقتالعان سوڭ بارامىن. سول كەزدە ارالاپ، تانىسارمىن. ال جالپى بۇل ەلدىڭ كەي ايماقتارىنداعى ساياسي جاعدايعا بايلانىستى ابايلاپ جۇرۋگە تۋرا كەلەدى.

- يراك قۇراماسىنا دەيىن تۇركيادا جۇمىس جاسادىڭىز، وندا باپكەر رەتىندە جەتىستىككە جەتە الدىڭىز با؟

- تۇركيا جاستار قۇراماسىن ەكى جىلداي جاتتىقتىردىم. رەسەيدىڭ اناپا قالاسىندا وتكەن جاستار اراسىنداعى ەۆروپا چەمپيوناتىندا ءبىر كۇمىس، ءبىر قولا مەدال الدىق. بۇل - تۇركيا بوكسى ءۇشىن وتە ءىرى جەتىستىك.

- ريو- دە- جانەيرو  وليمپياداسىنىڭ باستالۋىنا ءبىر جىل ۋاقىت قالدى. يراك قۇراماسىنىڭ وليمپيادا جولداماسىن الۋدان ءۇمىتى بار ما؟

- يراك 2008 جانە 2012 - جىلعى وليمپياداعا ءبىر بوكسشىدان اپارعان. ريوعا ەكى بوكسشى اپارعىمىز كەلەدى نەمەسە كەمىندە ءبىر جولداما الۋ ءۇشىن كۇش سالامىز.

- سۇحباتىڭىزعا راقمەت!