قىتاي حالىق- ازاتتىق ارمياسىنىڭ تانكىشىلەرى قازاقستانعا كەلدى - فوتو
قىتاي حالىق رەسپۋبليكاسىنان كەلگەن دەلەگاتسيانى اۋە ايلاقتا اياگوز گارنيزونىنىڭ اسكەري ءبولىم كومانديرلەرى مەن مەكەمە باسشىلارى قارسى الدى، دەپ حابارلايدى ق ر قورعانىس مينيسترلىگىنىڭ باسپا ءسوز قىزمەتى.
مەيماندار رەسەي فەدەراتسياسىنىڭ «الابينو» پوليگونىندا وتەتىن تانك بياتلونىنان الەم چەمپيوناتىنا بىرلەسكەن دايارلىق باعدارلاماسىمەن تانىستى. وسىدان كەيىن قىتاي ارمياسىنىڭ وكىلدەرى جاقىندا تانك بياتلونىنان قازاقستان رەسپۋبليكاسى قارۋلى كۇشتەرىنىڭ چەمپيوناتى وتكەن «مايلينو» تراسساسىن كوردى. اسپان استى ەلىنىڭ اسكەري قىزمەتشىلەرى شامامەن ءبىر اپتا قازاقستاندىق ارىپتەستەرىمەن بىرگە جاتتىعاتىنىن اتاپ وتكەن ءجون.
ەستەرىڭىزگە سالا كەتسەك، جۋىردا قازاقستان رەسپۋبليكاسى قارۋلى كۇشتەرى قۇرلىق اسكەرلەرىنىڭ ۇزدىك ەكيپاجدارى مەن جارىستىڭ الەمدىك كەزەڭىنە قاتىسۋشىلار انىقتالعان بولاتىن. بۇل جارىس ەكى كۇن بويى ءوتتى. ەكيپاجدار ەكى كەزەڭدە - جەكە سايىس جانە ەستافەتا بويىنشا بايگەگە ءتۇستى. تانك بياتلونى - الەمنىڭ ءتۇرلى ەلدەرى اراسىنداعى تانكتى جۇرگىزۋ جانە تانككە ورناتىلعان نەگىزگى جانە قوسىمشا قارۋدان ءدال اتۋ شەبەرلىگىن كورسەتۋ بويىنشا ەكيپاجدار اراسىنداعى باسەكە.
تۇڭعىش رەت تانك بياتلونى بويىنشا حالىقارالىق جارىس 2013 - جىلى ماسكەۋ ماڭىنداعى الابينو پوليگونىندا ءوتتى. سول كەزەڭنەن باستاپ قازاقستاندىق اسكەري قىزمەتشىلەردەن قۇرالعان كوماندا جىل سايىن ۇزدىك ۇشتىكتەر قاتارىنان كورىنىپ كەلەدى جانە بيىل ولار ءوز جەتىستىكتەرىن جەتىلدىرۋدى جوسپارلاپ وتىر.
