پاكىستان: ساۋد ارابياسىنا يادرولىق تەحنولوگيا بەرمەيمىز

استانا. قازاقپارات - پاكىستان سىرتقى ىستەر ءمينيسترى ايزاز احماد چاۋدحري يسلامابادتىڭ ءوزىنىڭ يادرولىق قارۋى مەن وعان قاتىستى تەحنولوگيانى ساۋد ارابياسىمەن بولىسەتىنىن جوققا شىعاردى.

 4 - ماۋسىمدا ۆاشينگتونعا ساپارىندا امەريكالىق رەسمي تۇلعالارمەن كەزدەسۋدەن سوڭ چاۋدحري پاكىستاننىڭ ساۋد ارابياسىمەن يادرولىق ماسەلەلەردى تالقىلامايتىنىن ايتىپ، «يسلامابادتىڭ يادرولىق قارۋى تەك پاكىستاننىڭ قورعانىسىنا قىزمەت ەتەتىنىن» مالىمدەدى.

ونىڭ سوزىنشە، پاكىستان يادرولىق قارۋىن نەمەسە ونى جاساۋعا قاجەتتى تەحنولوگيانى باسقا ەلگە ساتۋى نەمەسە بەرۋى مۇمكىن دەگەن اقپاراتتار «نەگىزسىز».

يادرولىق ارسەنالىندا 100 گە جۋىق يادرولىق وقتۇمسىق بار دەپ سانالاتىن پاكىستان بۇعان دەيىن يادرولىق قارۋ جاساۋ تەحنولوگياسىن يران، ليۆيا جانە سولتۇستىك كورەيامەن بولىسكەن.

الەمدىك كەيبىر دەرجاۆالار يران يادرولىق الەۋەتىن ارتتىرىپ جاتقان تۇستا ساۋد ارابياسى، تاياۋ شىعىستاعى وزگە دە مەملەكەتتەر پاكىستاننان يادرولىق قارۋعا يە بولۋعا كومەك سۇراۋى مۇمكىن دەپ قاۋىپتەنەدى.

ءبىراق چاۋدحري پاكىستان سوڭعى جىلدارى ەكسپورتقا باقىلاۋ جاساپ، ب ۇ ۇ باقىلاۋشىلارىنا قاجەتتى اقپاراتتاردى بەرۋ ارقىلى يادرولىق قارۋدى تاراتپاۋعا ءبىراز ۇلەس قوسقانىن ايتادى.

پاكىستان العاشقى يادرولىق قارۋىن 1998 - جىلى سىناعان. پاكىستاننىڭ الدىندا عانا ونىمەن كورشى ءۇندىستان يادرولىق قارۋىن سىناعان.

«ازاتتىق» سايىتى