رەسەيدە ەڭ كوپ اراق ىشىلەتىن قالالار بەلگىلى بولدى

 استانا. قازاقپارات - كراسنودار، ۋفا جانە ۆلاديۆوستوك ادام جانىنا شاققاندا سپيرتتىك ىشىمدىكتەردى ساتۋ كولەمىنىڭ رەيتينگى بويىنشا كوش باستاپ تۇر، دەپ حابارلايدى ر ي ا نوۆوستي.

اتالعان زەرتتەۋدى ستراتەگيالىق كوممۋنيكاتسيالار جانە الەۋمەتتىك جوبالار ينستيتۋتىنىڭ قىزمەتكەرلەرى جانە «فەدەرالپرەسس» اقپاراتتىق اگەنتتىگى جۇرگىزدى.

 «ءبىز تۇرعىندار سانى ءبىر ميلليون ادامنان اساتىن رەسەيدىڭ ەڭ ءىرى قالالارىن تاڭداپ، سونداي- اق بۇل تىزىمگە قيىر شىعىستىڭ ەڭ ءىرى قالاسى رەتىندە ۆلاديۆوستوكتى، تۇرعىندارى سانىنىڭ قارقىنى ونى ميلليون قالا قاتارىنا ۇمىتكەر رەتىندە ساناۋعا مۇمكىندىك بەرەتىن كراسنوداردى جانە زەرتتەۋدى تۇرلەندىرۋ ءۇشىن - قالعان قالالاردان ايتارلىقتاي كىشى، الايدا فەدەراتسيا سۋبەكتىسىنىڭ استاناسى بولىپ تابىلاتىن حانتى- مانسيسك قالاسىن ەنگىزدىك»، - دەيدى زەرتتەۋ اۆتورلارى.

 زەرتتەۋ جۇمىسى كەستە رەتىندە بەرىلگەن. بۇل جەردە قالالار سپيرتتىك ىشىمدىكتەردى (سىرانى ەسەپكە الماعاندا) ادام باسىنا شاققانداعى ساتۋ كولەمى بويىنشا ورنالاستىرىلعان. وندا فەدەرالدىق ستاتيستيكا قىزمەتىنىڭ مالىمەتتەرى قولدانىلدى.

 زەرتتەۋگە سايكەس، كراسنوداردىڭ قاراپايىم تۇرعىنى جىلىنا 20,63 ليتر ۋفا تۇرعىنى - 19,9 ليتر، ال ۆلاديۆوستوك تۇرعىنى - 19,21 ليتر ىشىمدىك ساتىپ الادى.

 رەسەيدىڭ كوپتەگەن قالالارىندا بۇل سان جىلىنا 11 دەن 15 ليترگە دەيىن. ياعني، زەرتتەۋ اۆتورلارىنىڭ اتاپ وتۋىنشە، قالانىڭ قاراپايىم تۇرعىنى ەكى اپتادا ءبىر رەت ءبىر بوتەلكە ىشىمدىك الادى.

 ماسكەۋ جانە سانكت- پەتەربور 18 قالادان تۇراتىن ءتىزىمنىڭ سوڭىندا تۇر. ورتاشا ستاتيستيكالىق ەسەپ بويىنشا ماسكەۋلىك جىلىنا 7,5 ليتر، ال پەتەربورلىق - 8,38 ليتر ىشىمدىك ساتىپ الادى ەكەن.

سىرانى ىشۋگە كەلەتىن بولساق، ونى سامارادا ەڭ كوپ ىشەتىنى بەلگىلى بولدى (جىلىنا 89,8 ليتر).