سىرىم اۋدانىندا ءسابي وزدىگىنەن سۇندەتتەلىپ قالعان
جەرگىلىكتى جۋرناليست شىنار مولدانيازوۆانىڭ حابارلاۋىنشا، 3 - ماۋسىم كۇنى تاڭ قىلاڭ بەرە ايات جىلاپ ويانادى.
اناسى اسەم دە بالاسىنىڭ داۋسىنان ويانىپ، قاسىندا جاتقان اكەسىنىڭ ءبىر جەرى قاتتى ءتيىپ كەتتى مە ەكەن دەپ ۋايىمدايدى. ۇيقىدان ويانعان سوڭ، ايات ناسىبايىن اۋىرسىنىپ جىلايدى. اتاسى بولات: «قانە، كورەيىن» دەپ قاراسا، ناسىبايىنىڭ ۇشى پىشاقپەن ءتىلىپ جىبەرگەندەي، ەكىگە ايىرىلىپ تۇر ەكەن. بالالارىنا: «اياتتى پەرىشتە سۇندەتتەپ كەتكەن»، - دەيدى. مۇندايدى ەستىپ- كورمەگەن جاس اتا- انا اڭ- تاڭ بولادى.
ايات «سۇندەتتەلگەن» كۇنى ءسال اۋىرسىنىپ، قىزۋلاعانىمەن، قازىر شاۋىپ ويناپ ءجۇر. ال بولات تەمىرعاليەۆتىڭ اكەسى باقىت اتانىڭ، ونىڭ ارعى اتا- بابالارىنىڭ كىسى ەمدەيتىن، ارقالى، قولى شيپالى جاندار بولعانىن ەل بىلەدى. بولاتتىڭ سوزىنە قاراعاندا، كىشكەنە كۇنىندە ءوزىن دە، دۇنيەدەن وزعان ۇلى ەربولدى دا وسىلاي «پەرىشتەلەر سۇندەتتەپ» كەتكەن ەكەن. «مۇنداي وقيعا ءبىز ءۇشىن تاڭسىق ەمەس. تۇقىمىمىزدا ءۇشىنشى رەت ورىن الىپ وتىرعان جايت بۇل. اتالارى شوپشەك، نەمەنەمىزدىڭ دەنەسىنە پىشاق تيمەسىن دەگەن نيەتپەن وسىلاي ەتكەن شىعار»، - دەيدى. بولات تەمىرعاليەۆتىڭ ءوزى دە قازىر بالا قيىپ، سىنىق سالادى.
ايات 2012 - جىلى قۇربان ايت كەزىندە دۇنيەگە كەلىپ، ەسىمى سوعان وراي ايات دەپ اتالىپتى. الدىندا ەكى اپكەسى بار. اجەسى جۇمازيانىڭ ايتۋىنشا، كىشكەنتاي ايات ادەيىلەپ ەشكىم ۇيرەتپەسە دە، استان سوڭ بەت سيپايدى ەكەن.
وتباسىندا تىلسىم جايت ورىن العان سوڭ، بولات سىرىم اۋداندىق مەشىتىنىڭ وكىل يمامى ارمات كارىموۆتى شاقىرتىپ، شەلپەك ءپىسىرىپ، قۇران وقىتتى. ەندى قۇداي جولىندا ساداقا بەرمەك. «بۇل - تەك اللانىڭ قالاۋىمەن بولعان ءىس. مۇنداي وقيعا ارقىلى اللاھ تاعالا ادامنىڭ ورەسى جەتپەيتىن تىلسىم كۇشتىڭ بارىن سەزدىرتىپ، ازعىنداپ بارا جاتقان ادامدارعا وي سالعىسى كەلگەن شىعار» ، - دەدى يمام ا. كارىموۆ.
اۆتور: ەلجان ەرالى
