سپورتشىلار ءۇشىن دە مەملەكەتتىك رامىزدەردىڭ ماڭىزى زور
بۇل تۋرالى ەركىن كۇرەستەن جاسوسپىرىمدەر اراسىندا الەم چەمپيونى، ەرەسەكتەر اراسىندا الەم جانە ازيا بىرىنشىلىگىنىڭ قولا جۇلدەگەرى ەكاتەرينا لاريونوۆا ءمالىم ەتتى.
ونىڭ ايتۋىنشا، جەڭىس تۇعىرىنا كوتەرىلگەن ساتتە الاتىن اسەر ايرىقشا. ونى سوزبەن ايتىپ جەتكىزۋ مۇمكىن ەمەس.
«جەڭىمپازدىڭ قۇرمەتىنە كوك بايراق كوككە سامعايدى، جۇرەگىڭدى شىمىرلاتىپ ءانۇران شىرقالادى. سونداي كەزدە جۇرەگىڭدى وتانىڭا دەگەن ماقتانىش سەزىمى كەرنەيدى. ءتىپتى كوز جاسىڭا يەلىك ەتە الماي قالاتىن ساتتەر دە بولادى. مۇنىڭ ءبارىن مەن ءبىر عانا سوزبەن تۇسىندىرە الامىن. ول - تۋىپ-وسكەن جەرىڭە، سەنىڭ جەتىستىككە جەتۋىڭە بار جاعدايدى جاساعان ەلىڭە دەگەن ىستىق سەزىم، ايرىقشا ادامي سۇيىسپەنشىلىك، ماحاببات.
سوندىقتان مەن بارشا قازاقستاندىقتاردى مەملەكەتتىك رامىزدەرىمىزدى قۇرمەتتەۋگە شاقىرا وتىرىپ، ءوزىمىز الداعى ۋاقىتتا دا ەلىمىزدىڭ ابىرويى ءۇشىن حالىقارالىق جارىستاردا بار كۇش-جىگەرىمىزدى جۇمسايتىن بولامىز»، - دەدى ە. لاريونوۆا.
اۆتور: ەلجان ەرالى
