ساۋالناما: قازاقستان تۋىن الەم ەلدەرى قانشالىقتى تانيدى؟
يتالياداعى تىلشىلەرىمىز كارى قۇرلىق جۇرتىنا كوك بايعارىمىزدى كورسەتىپ، ەرەكشە ساۋالناما جۇرگىزدى. جاۋاپ ءارتۇرلى بولدى.
كارى قۇرلىق تۇرعىندارى قازاقستان تۋىن يتاليادا ءوتىپ جاتقان ەكسپو (ЕХРО) كورمەسىنەن ءجيى كورەدى. قىزىقتى دا كەلىستى ناقىشتا جاسالعان وتاندىق پاۆيلون كەلۋشىلەرگە كەرەمەت اسەر قالدىرۋدا. ەندى ونى ۇمىتا قويۋلارى ەكىتالاي. بۇدان بولەك، وسىدان بىرنەشە كۇن بۇرىن اتاقتى «دجيرو يتاليا» كوپ كۇندىگى ءوز مارەسىنە جەتكەن بولاتىن. ايعا جۋىق كوك بايراقتى كەۋدەشە كيگەن «استانا» شاباندوزدارى الەم نازارىن وزىنە اۋداردى. تالاي كەزەڭدە توپ جارعان قازاقستاندىق كلۋب مۇشەلەرى اقىرى جالپى ەسەپتە ۇزدىك ۇشتىكتەن تابىلدى.
ال مەملەكەتتىك رامىزدەر كۇنىنە وراي وتكىزگەن ساۋالنامامىزعا يتاليا جۇرتى مىناداي جاۋاپ ايتتى. ءبىزدىڭ ساۋالناماعا قاتىسقانداردىڭ كوبى قازاقستانىڭ قازبا بايلىققا باي ەكەندىگى، ەكونوميكاسى قارقىندى دامىپ جاتقانىن جانە اتاقتى سپورتشىلاردىڭ كوپ ەكەنىن ايتىپ بەردى. الايدا ارالارىندا كوك بايراعىمىزعا باسقاشا انىقتاما بەرگەندەر دە كەزدەستى.
مىسالى، «ب ۇ ۇ جانىنداعى بالالارعا كومەك بەرۋ توتەنشە قورىنا ۇقسايدى. الدە ول ەمەس پە؟»، «كاريب ارالدارىنداعى ەل مە؟ كوگەرشىن، كۇن، بەيبىتشىلىك دەگەن سياقتى» دەگەن جاۋاپتار دا بولدى. ارينە، بۇل ادامداردى دا تۇسىنۋگە بولادى. مەملەكەتتىك رامىزدەردىڭ قابىلدانعانىنا بار بولعانى 23 جىل ءوتتى. ال 2017 - جىلى استانادا وتەتىن ЕХРО كورمەسى ولاردىڭ ابىرويىن ودان سايىن اسقاقتاتا تۇسەرى انىق.
