جاڭا زامانعا ساي مەملەكەتتىك قىزمەت تۋرالى جاڭا زاڭ قابىلداناتىن بولادى - ق. سۇلتانوۆ

 استانا. قازاقپارات - جاڭا زامانعا ساي مەملەكەتتىك قىزمەت تۋرالى جاڭا زاڭ قابىلداناتىن بولادى.

 بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە ق ر پارلامەنتى ءماجىلىسىنىڭ دەپۋتاتى قۋانىش سۇلتانوۆ ءمالىم ەتتى.

ونىڭ سوزىنە قاراعاندا، ارنايى جۇمىس توبى اتالعان زاڭنىڭ جوباسىن جاساقتاۋعا كىرىسىپ تە كەتكەن. «ينستيتۋتسيونالدى 5 رەفورمانى جۇزەگە اسىرۋدىڭ «100 قادامى» باعدارلاماسىندا ناقتى ايتىلعان: «مەملەكەتتىك قىزمەت تۋرالى جاڭا زاڭ قابىلداۋ» دەپ.

ەلباسىنىڭ وسىنداي تاپسىرماسى بار. بۇعان ءبىزدىڭ قوعام دا دايىن دەپ ەسەپتەيمىن، ۇكىمەت جانە ءبىزدىڭ پارلامەنت تە دايىن. ويتكەنى بىزدە ساراپتامالىق ماعلۇماتتار جەتكىلىكتى. مىسالدار دا جەتكىلىكتى. مەملەكەتتىك قىزمەتكەرلەردى دايىنداۋدا قاي جەردە قانداي كەمشىلىگىمىز بار، قانداي كەزەڭدەردەن ءبىز وتتىك، مەملەكەتتىك قىزمەت تۋرالى زاڭداردا قانداي تاجىريبەلەردەن وتتىك - سونىڭ بارلىعى انىقتالدى، وسى ماتەريالداردىڭ بارلىعى بىزدەردە جەتكىلىكتى.

الداعى ۋاقىتتا جاڭا زامانعا، جاڭا تالاپقا ساي مەملەكەتتىك قىزمەت تۋرالى جاڭا زاڭ قابىلداناتىن بولادى. ونىڭ توڭىرەگىندە ءالى تالاي اڭگىمە بولادى، ول تۋرالى پىكىرتالاستار بولادى. ونى جۇمىس توبىندا، ب ا ق- تا تالقىلايمىز، كوپتەگەن كونفەرەنسيالار وتكىزىلەدى»، - دەدى ول.

ماجىلىسمەننىڭ سوزىنە قاراعاندا، زاڭ جوباسىن دايىنداۋ، ونى قابىلداۋ كوپ ۇزاققا بارماي، تاياۋ جىلداردا ىسكە اسادى.

 اۆتور: جاسۇلان جولدىبايەۆ