الماتىدا مىڭداعان ادام ەلىمىزدىڭ ءانۇرانىن شىرقادى
سالتاناتتى شارا ق ر مەملەكەتتىك رامىزدەر كۇنىنە وراي ۇيىمداستىرىلدى.
«ۇلتتىق نىشان دەگەنىمىز قۇر سالىنا سالىنعان سۋرەت ەمەس. ول كەز-كەلگەن مەملەكەتتىڭ ۇلتتىق بەلگىلەرى، ول تاۋەلسىزدىك پەن بوستاندىقتى بىلدىرەدى. مەملەكەتتىك رامىزدەر قۇندىلىقتاردىڭ بىرىگۋىن بەينەلەيدى. ءوز تۋىنا، ەلتاڭباسىنا، ءانۇرانىنا دەگەن قۇرمەت ۇرپاقتان ۇرپاققا بەرىلىپ، ەلدىڭ تاريحي تۇتاستىعىن قامتاماسىز ەتەدى. مەملەكەتتىك رامىزدەر حالىقتى ەرلىككە بارۋعا، ەل جولىندا ءوز ءومىرىن قۇربان ەتۋگە ۇمتىلدىرعان. ول جونىندە ادامزات تاريحىندا ساقتالعان تاريحي دەرەكتەر جەتەرلىك»، - دەدى قالا باسشىسى احمەتجان ەسىموۆ.
قالا باسشىسى تاۋەلسىزدىك جىلدارىندا قازاق ەلىنىڭ ءانۇرانى، ەلتاڭباسى، تۋى شارشى الەمگە تانىلا باستاعانىن جەتكىزدى.
«قازاقستاننىڭ كوك بايراعى ءىرى حالىقارالىق ۇيىمداردىڭ توبەسىنە تىگىلدى، عارىشقا ساپارلاپ، الەمنىڭ ەڭ بيىك شىڭدارىنان جەلبىرەدى. ەلىمىزدىڭ مەرەيلى ءانۇرانى كوپتەگەن حالىقارالىق ارەنالاردا شىرقالىپ ءجۇر»، - دەدى اكىم.
سالتاناتتى شارا سوڭىندا وتاندىق ەسترادا جۇلدىزدارى ونەر كورسەتتى.
اۆتور: گۇلميرا عوسمانالي
