قوستاناي وبلىسىندا كيىكتەردەن سوڭ، ءتورت تۇلىك مال قىرىلا باستادى
وقىس وقيعاعا قاتىستى اۋدان اكىمى ورىنباسارىنىڭ پىكىرىن الۋ مۇمكىن بولدى.
«قولداعى ءىرى-قارانى بەلگىلى ءبىر كەسەلدەن جاپپاي قىرىلىپ جاتىر دەپ ايتا المايمىز. سەبەبى، ءتورت تۇلىكتىڭ ءولىم-ءجىتىمى ەكى ايدان بەرى تىركەلىپ كەلەدى. تەك، ءبىر شارۋا قوجالىعىندا عانا قۇلىن، بۇزاۋىن قوسا ەسەپتەگەندە، 13 باس مال قىرىلىپ قالعان.
ال اۋىل ۇيلەردەن شەتىنەگەندەرى بىرەن-ساران. مالدىڭ نەدەن قىرىلعانىن انىقتاۋ ماقساتىندا، ولەكسەلەردەن ارنايى سىناما الىنىپ، ساراپتاماعا جىبەرىلدى. ونىڭ قورىتىندىسى ون كۇن شاماسىندا ءازىر بولادى. سول كەزدە ناقتى شارا قولداناتىن بولامىز»، - دەيدى جانكەلدين اۋدانى اكىمىنىڭ ورىنباسارى شوتا وسپانوۆ.
تەك، ءبىر شارۋا قوجالىعىندا عانا قۇلىن، بۇزاۋىن قوسا ەسەپتەگەندە، 13 باس مال قىرىلىپ قالعان
اكىم ورىنباسارى ءتورت تۇلىككە كيىكتەرگە تيگەن كەسەلدىڭ جۇقپاعانىن ايتادى.
«قوراداعى مالعا پاستەرەللەزگە قارسى ەگۋ جۇمىستارى دەر كەزىندە جۇرگىزىلدى. دەي تۇرعانمەن، اۋىل-ايماقتاعى ءتورت تۇلىكتىڭ بارلىعىن قامتۋ مۇمكىن بولمادى. سەبەبى، بىزدەرگە ىندەتكە قارسى ءدارى-دارمەكتەر جوسپارلى تۇردە، بەلگىلى ءبىر مولشەردە عانا بەرىلەدى. ەگەر ىندەت وشاعى وسى جەردەن انىقتالىپ جاتسا، جوعارعى جاقتىڭ پارمەنىمەن قوسىمشا قارجى ءبولىنىپ، ءدارى-دارمەكتەر دە مولىنان الىنار ەدى. ازىرگە، اۋرۋعا شالدىققان مالعا انتيبيوتيك سالىپ، اڭىسىن اڭداپ وتىرمىز. ۆەتەرەناريا ماماندارى مالدىڭ شوپتەن ۋلانۋى مۇمكىندىگىن جوققا شىعارمايدى»، - دەيدى شوتا وسپانوۆ.
ەسكە سالا كەتەيىك، ەلىمىزدە بەلگىسىز سەبەپتەرمەن قىرىلىپ قالعان كيىكتەر سانى 120 مىڭعا جەتتى. كيىكتەردىڭ قىرىلۋى العاش بولىپ مامىر ايىنىڭ ورتا تۇسىندا قوستاناي وبلىسىندا بايقالعان ەدى.
Nur.kz
