ت. مۇسابايەۆ: بايقوڭىردا قۇلاعان «پروتون-م» زىمىران تاسىعىشىنىڭ كەلتىرگەن زالالىن وتەۋ داۋى ەشقاشان توقتامايدى

استانا. قازاقپارات - بايقوڭىردا قۇلاعان «پروتون- م» زىمىران تاسىعىشىنىڭ قازاقستان ەكولوگياسىنا كەلتىرگەن زالالىن ەسەپتەۋ بويىنشا بىرلەسكەن قۇجات دايىندالۋدا.

 بۇل تۋرالى بۇگىن ق ر پارلامەنتى سەناتىنىڭ جالپى وتىرىسىندا اەروعارىش كوميتەتىنىڭ ءتوراعاسى تالعات مۇسابايەۆ ءمالىم ەتتى.

«پروتوننىڭ» قۇلاۋىنا بايلانىستى رەسەيدىڭ وتەماقى تولەۋ ماسەلەسى جونىندە. داۋ ءالى بىتكەن جوق، مەنىڭشە ول ەشقاشان بىتپەيدى دە. نەگىزى بۇل ءبىزدىڭ كوميتەتتىڭ، ءبىزدىڭ مينيسترلىكتىڭ ەمەس، ەنەرگەتيكا مينيسترلىگىنىڭ قۇزىرى. وندا تابيعاتتى قورعاۋ كوميتەتى بار، ولار زالال مولشەرىن انىقتادى.

بىزگە تۇسىنىكسىز وزدەرىنىڭ ىزدەۋلەرى مەن زەرتتەۋلەرى بويىنشا 14 ميلليارد تەڭگە دەپ قورىتىندىلاپتى. شىنىنا كەلسەك، ەگەر زالال شىعىنىن ەسەپتەۋگە مۇمكىندىك بەرەتىن بىرلەسكەن ەرەجەلەر نەمەسە قۇجات قابىلدانباسا، بۇل ماسەلە ەشقاشان شەشىمىن تاپپايدى»، - دەدى ول دەپۋتاتتاردىڭ ساۋالىنا بەرگەن جاۋابىندا.

ونىڭ ايتۋىنشا، مۇنداي بىرلەسكەن قۇجاتتى قازىر ەكى ەلدىڭ ماماندارى دايىنداۋعا كىرىسكەن. «قازىرگى ۋاقىتتا مۇنداي قۇجات رەسەيمەن بىرگە جاسالىپ جاتىر، مەنىڭ بىلۋىمشە»، - دەپ ءتۇيدى ت. مۇسابايەۆ.

ەسكە سالا كەتەيىك، 2013 -جىلى 2 -شىلدە ايىندا «پروتون- م» زىمىران تاسىعىشى بايقوڭىر ايلاعىندا ستارت كەزىندە جەرگە قۇلاعان بولاتىن. قازاقستان رەسەي تاراپىنا ونىڭ زالالىن وتەۋگە 90 ميلليون دوللار شاماسىندا وتەماقى كولەمىن بەلگىلەگەن. كەيىن روسكوسموس ءوزىنىڭ تاۋەلسىز ەسەپتەۋلەرىن جۇرگىزەدى دەپ مالىمدەدى.

زىمىران تاسىعىشىنىڭ بورتىندا 600 توننا گەپتيل، اميل مەن كەروسين بولدى.

اۆتور: جاسۇلان جولدىبايەۆ