ءتورت وليمپيادانى كورگەن بايراق

استانا. قازاقپارات - بۇل بايراق، قازاقستاننىڭ كوك تۋى، «ەگەمەننىڭ» مەنشىگىندەگى كوك بايراق ەڭ الدىمەن سيدنەي وليمپياداسىندا ءبىر توپ رەداكتسيا قىزمەتكەرىنىڭ قولىندا جەلبىرەپ بارىپ، جەلبىرەپ قايتتى. ول ءبىر داۋرەن ەكەن.

 جۇمىر جەردەگى بارلىق مەملەكەتتەردىڭ گۇرزى جۇدىرىقتارى توقايلاسقان حانبازار الاماننىڭ اقتىق سىنىنا قازاقتىڭ شوقپار جۇدىرىق ءتورت جىگىتى شىعىپ، الەمنىڭ كوز قۇرتىنا اينالدى. كوك تۋ جەلدەن جۇيرىك ولگا شيشيگينانىڭ يىعىندا جەلبىرەدى.

بۇل بايراق افينا وليمپياداسىنا باردى. باقتيار ارتايەۆ سىندى دارابوز قارسىلاس شاق كەلتىرمەي جەڭىپ، ەڭ ۇزدىك بوكسشىعا بەرىلەتىن ۆەل باركەر كۋبوگىن العاندا ەللادا ەلىندە، وليمپيا ويىندارىنىڭ باستاۋ العان تاريحي وتانىندا جەلبىرەدى. بۇدان سوڭ «ەگەمەننىڭ» بايراعى ءبىزدىڭ قولعا ءتيدى. بەيجىڭ جانە لوندون وليمپيادالارىنا، كاتاردا جانە گۋانچجوۋدا وتكەن ازيا ويىندارىنا باردى. حالىقارالىق اككرەديتتەۋمەن قازاقستاننان ءۇش ءتىلشى، ءبىر ءفوتوتىلشى بارسا، ءبىرى «ەگەمەننىڭ» ءتىلشىسى. مۇنىڭ تۋريست بولىپ بارعان جۋرناليستەردەن ەرەكشەلىگى -  اشپايتىن ەسىگى، ياعني الدىندا كەدەرگىسى جوق. دۇنيەجۇزىنەن ىرىكتەلگەن، وليمپيا ويىندارىنىڭ جەڭىمپازدارى جۋرناليستەر الدىنا شىعىپ سۇحبات بەرەتىن باسپا ءسوز ءماسليحاتىنا رۇقساتى بار تورتەۋمىز كىرەمىز. جارىستى تاماشالاۋ، رەپورتاج جازۋ ءۇشىن بولەك ورىن بەرىلەدى. ءوزىم وتىرعان ۇستەلگە «ەگەمەننىڭ» كوك بايراعىن، ياعني قازاقستاننىڭ كوك تۋىن جايناتىپ جايىپ قويامىن. بەيجىڭنەن ورالعان سوڭ «جاس الاش» گازەتىنە جازعان ساراپتامالىق ماقالاسىندا نەسىپ جۇنىسبايەۆ اعامىز «حالىقارالىق جۋرناليستەر وتىراتىن ارنايى لوجادا باقتيار كوك تۋدى جايىپ وتىرادى. ول جەرگە تۋ اپارۋعا بولمايتىنىن بىلمەي مە، الدە باۋىرىمنىڭ پاتريوتتىعى ما» دەگەندەي وي ايتقان ەكەن. تۋدى الىپ كىرۋگە بولمايتىنىن بىزگە ەسكەرتكەن.

 بىزدىكى بىلمەگەندىك ەمەس، قارسى ماڭدايدا قازاقستاننىڭ كوك بايراعى جايناپ تۇرىپ، ساڭلاقتارىمىزدىڭ قايراتىنا قايرات، جىگەرىنە جىگەر، نامىسىن ودان ءارى قاراي جانىسا دەگەن نيەت قوي. بەيجىڭدە اسحات جيتكەيەۆ قازاق جاستارى اراسىنان دزيۋدودان كۇمىس جۇلدەگەر اتاندى. موڭعول نايدانمەن مايدانداسىپ شىققان ساتىندە يىعىنا جاپقانبىز. سۇحباتتاسىپ تۇرعانىمىزدا جەڭىمپازداردى ماراپاتتاۋعا شاقىرىپ «ەگەمەننىڭ» كوك تۋى اسحات باۋىردىڭ اشى تەرى اڭقىعان يىعىندا كەتتى. كەيىن بەيجىڭ وليمپياداسىنىڭ جەڭىمپازى باقىت سارسەكبايەۆتىڭ قولىنا ۇستاتتىق. ال لوندون وليمپياداسىندا قازاقستاننىڭ كوك بايراعىنىڭ بەنەفيسى بولدى دەسەك جاراسار. جىگىتتەرىمىز بەن قىزدارىمىز كۇن قۇرعاتپاي التىن الىپ جاتىر. سان مىڭداعان سپورتشى مەن جانكۇيەرلەر جينالعان سارايدا، ءارتۇرلى جارىستان شىعىپ، تەڭىزدەي ساپىرىلعان حالىق تولقىنىندا قازاقستان بايراعى كوزگە وتتاي باسىلار ەدى. قازاقتىڭ ءانۇرانى لوندونداعى ەڭ تانىمال انگە اينالىپ، كوك بايراعى جەلكىلدەدى دە ءجۇردى. جۇمىر جەردەگى بار حالىقتىڭ ورتاسىنان كەلگەن جانكۇيەرلەر قىزىعا دا، قىزعانا دا قارايتىنىن ىشتەي سەزەمىز. كوك تۋدى جامىلىپ كەلە جاتساڭ اعىلشىن، نەمىس، فرانتسۋز، الدە يتاليان، الدە يسپان رياسىز كۇلىپ، ءتىلىن بۇراپ «قازاقستان» دەپ باس بارماعىن كورسەتەدى.

وتانشىلدىقتى ەلباسىنان ۇيرەنۋ كەرەك. لوندوندا اۋىر اتلەت، بوكسشىلار جارىسى كەشكى باعدارلاماعا قويىلادى. ارادا التى ساعاتتاي ايىرما بار. جەڭىمپازداردى ماراپاتتاۋ قازاقستان ۋاقىتى بويىنشا تاڭعى ءتورت- بەس ساعات شاماسىنا كەلەدى. ساڭلاقتارىمىزدى تەرلەرى بالاقتان اعىپ جەڭىمپاز بولىپ كەلە جاتقاندا اككرەديتتەلگەن جۋرناليستەر عانا جىبەرىلەتىن قىلتادان كۇتىپ الامىز. -  راحمەت، نۇرسۇلتان اعا. ءوزىمىزدىڭ  قىزىلوردانىڭ سارى التىن ۇلى يليا يلين باقىتتان بال- بۇل جايناپ ەلباسىمەن سويلەسەدى. يىعىنا لىپ ەتكىزىپ بايراق جابامىز. جەڭىمپازدىڭ تەرى تەڭبىلدەنىپ سىڭەدى. «كازپراۆدانىڭ» ءتىلشىسى يۋري ليفينتسيەۆ ميىعىنان كۇلەدى. تۇسىنەدى. قانشا وليمپيادا كورگەنىن ايتقانبىز عوي. بۇل تۋدى جامىلىپ تۇرىپ ءزۇلفيا چينشانلو ەلباسىنىڭ قۇتتىقتاۋىن ەستىدى. باقىتتان باسى اينالعان قارشاداي قىزدىڭ كوزىنەن لاعىل تامشىلار توگىلدى. مايا مانەزا، سۆەتلانا پودوبەدوۆا دا، جارىستىڭ سوڭعى كۇنى داڭقتى جەڭىسىنە تۇماندى البيون حالقى عانا ەمەس، بۇكىل دۇنيەجۇزى قول سوققان سايىپقىران سەرىك ساپييەۆ تە جامىلدى. قازاقتىڭ ءبىر تۋىنىڭ قىسقاشا تاريحى وسى. ...تالاسقا تۇسسە جان مەن تۋ جان ەمەس ماعان كەرەگى... ساڭلاقتارىمىزدان وسى قاسيەتتى بايقادىق. ءتورت وليمپيا ويىندارى دۇنيەجۇزىنە قازاق قايراتىن وسىلايشا تانىتتى.

 

 باقتيار تايجان، «ەگەمەن قازاقستان»