رەسەيدەن ابايدىڭ ۇلدارىنىڭ ومىرىنە قاتىستى دەرەكتەر اكەلىندى

استانا. قازاقپارات - اباي مۋزەيى جاڭا ارحيۆتىك دەرەكتەرمەن تولىقتى، - دەپ حابارلايدى Tengrinews.kz ءتىلشىسى ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

باسپا ءسوز قىزمەتىنىڭ مالىمەتىنشە، ابايدىڭ مەملەكەتتىك قورىق-مۇراجايىنىڭ قىزمەتكەرلەرى قايرامبايەۆا، الدابەرگەنوۆا مەن ەلەكەنوۆا ومبى قالاسىنا ءىس-ساپارمەن بارىپ قايتتى.  

ءىس-ساپار بارىسىندا ومبى وبلىستىق مەملەكەتتىك تاريحي ارحيۆىندە زەرتتەۋ جۇمىستارى جۇرگىزىلدى. سونىمەن قاتار، ارحيۆ كىتاپحاناسىنداعى سيرەك كىتاپتار مەن XIX-XX عاسىرلارداعى مەرزىمدى باسىلىمدار قاراستىرىلدى.

«ومبى قالاسىنداعى رەسەي عىلىم اكادەمياسىنىڭ ەتنوگرافيا جانە ارحەولوگيا ينستيتۋتىنىڭ قىزمەتكەرلەرىمەن كەزدەسىپ، قازاقستان تاريحىنا قاتىستى دەرەكتەر الىندى. ءىس-ساپار ناتيجەسىندە ابايدىڭ ءىنىسى وقىعان ومبى كادەت كورپۋسىنا، ابايدىڭ ۇلدارى ماعاۋيا مەن تۇراعۇلدىڭ ومىرىنە قاتىستى دەرەكتەردىڭ كوشىرمەلەرى الىنىپ، مۇراجاي قورى تولىقتىرىلدى»، - دەلىنگەن مينيسترلىكتىڭ حابارلاماسىندا.