قىتايدا ۇزدىك وقۋىمەن كوزگە تۇسكەن قازاقستاندىق ستۋدەنتتەر ەلشىنىڭ العىس حاتىمەن ماراپاتتالدى

استانا. قازاقپارات - قازاقستاننىڭ قىتايداعى ەلشىسى شاحرات نۇرىشيەۆ ق ح ر-دا ءبىلىم الىپ جاتقان قازاقستاندىق ستۋدەنتتەرمەن كەزدەستى، دەپ حابارلايدى ق ر س ءى م باسپا ءسوز قىزمەتى.

ەلشى ق ر پرەزيدەنتى نۇرسۇلتان نازاربايەۆتىڭ باستاماسىمەن جۇرگىزىلىپ وتىرعان «قازاقستان - 2050» ستراتەگياسى، «نۇرلى جول» جاڭا ەكونوميكالىق ساياساتى جانە «بەس ينستيتۋتسيونالدىق رەفورمانى ىسكە اسىرۋ جونىندەگى 100 ناقتى قادام - ۇلتتىق جوسپارىن» ىسكە اسىرۋ جولدارى مەن ماڭىزدىلىعى تۋرالى ستۋدەنتتەردى جان-جاقتى حاباردار ەتتى.

كەزدەسۋ بارىسىندا ش. نۇرىشيەۆ قازاقستاندىق جاستاردىڭ ساپالى ءبىلىم الۋىنا، جەرگىلىكتى زاڭ ەرەجەلەرىن ساقتاۋىنا، قىتايدىڭ مادەنيەتى مەن ءداستۇرىن سىيلاۋىنا ەرەكشە نازار اۋداردى. سونىمەن قاتار، ستۋدەنتتەردىڭ وزدەرىنە، سونداي-اق قازاقستاننىڭ يميدجىنە كەرى اسەر تيگىزەتىن قانداي بولسا دا جاعدايلاردى بولدىرماۋعا شاقىردى.

ش. نۇرىشيەۆ ەلشىلىكتىڭ قولداۋىمەن قۇرىلعان 11 مىڭداي جاستاردى بىرىكتىرەتىن قىتايداعى قازاقستاندىق ستۋدەنتتەر قوعامداستىعىنىڭ جۇمىسىنا وڭ باعا بەردى.

ەلشى ستۋدەنتتەرگە الداعى ەمتيحانداردى ءساتتى تاپسىرۋىن تىلەپ، العان بىلىمدەرىن قازاقستاننىڭ يگىلىگى مەن ەكى ەل اراسىنداعى قارىم-قاتىناستى ودان ءارى نىعايتۋ ءۇشىن پايدالانۋىنا نازار اۋداردى.

ۇزدىك وقۋىمەن كوزگە تۇسكەن جانە قوعامدىق ءىس-شارالارعا بەلسەندى قاتىسقان ستۋدەنتتەر ەلشىنىڭ العىس حاتىمەن ماراپاتتالدى.