پەرىشتەلەردىڭ قاعباعا قونعان ءساتى بەينەباقىلاۋعا ءتۇسىپ قالدى - كەسكىن

استانا. قازاقپارات - مىنا كورىنىس پەرىشتەلەردىڭ بۇل دۇنيەدە بار ەكەنىن ايعاقتايتىنداي... پەرىشتەلەر نۇردان جاراتىلعان، سوندىقتان ولاردىڭ جاراتىلىستارىندا نۇر باستى ءرول وينايدى.

پەرىشتە ۇعىمى («مالايكا» ءسوزى) «پايعامبارلىق، ەلشىلىك، وكىلدىك، ۇلى ىستەردىڭ قالاۋشىسى» جانە «زاڭعار بيىكتىكتەن ءتۇسۋ» دەگەن ماعىنالاردى بىلدىرەدى. ءدىني تەرمينولوگيادا «پەرىشتە» ءسوزى («مالاك») ماكرو الەم مەن ميكرو الەم اراسىندا بايلانىس قۇراتىن، ەلشىلىك قىزمەت اتقاراتىن، حابار جەتكىزەتىن، جاقسىلىققا يتەرمەلەيتىن نيەتتى ىزگىلىككە بۇراتىن وتە كيەلى ەلشىلەر توبىنا ايتىلادى.

ولار عايىپ الەمگە قۇلاق اسادى ءارى كوبىنە سول الەمنىڭ قىزمەتىندە جۇرەدى، ەكى دۇنيەدە دە ءجۇرىپ جاتقان اللاھ تاعالانىڭ قۇدىرەتتى ىستەرىن ۇلىقتايدى.

پەرىشتەلەر تەك «ءامىر» الەمىنىڭ وكىلدەرى عانا ەمەس، ولاردىڭ دەنەسى دە نۇردان تۇرادى. تىم نازىكتىگىمەن، نۇرلى شۇعىلاسىمەن ەرەكشەلەنەدى. سوندىقتان ولاردىڭ ءجۇرىس-تۇرىسى، قيمىل-قوزعالىسى، ءبىر نارسەنىڭ ىشىنە ەلەۋسىز كىرىپ-شىعۋ قابىلەتى دە وتە جىلدام ءارى ايرىقشا جاراتىلعان.

ادامنىڭ كوز قاراشىعىنا ورنالاسىپ، ونى جاقسىلىققا قاراتىپ، ادەمى نارسەلەرگە كوڭىلىن بۇرادى. پايعامبار مەن اۋليەلەردىڭ جان سارايىنا باسقاشا، ال وسىمدىكتەر مەن حايۋاندار الەمىنە مۇلدەم وزگە پىشىندە ەنە الادى. جان دۇنيەمىزگە قۇيىلاتىن شابىت كوبىنە تىكەلەي اللاھ تاعالادان كەلەدى، كەيدە پەرىشتەلەر جەتكىزەدى. پەرىشتەلەر «اللاھ تاعالانىڭ بۇيرىقتارىنا قارسى كەلمەيدى، ءامىر ەتىلگەن نارسەلەردى ورىندايدى»

[1]. بۇل - پەرىشتەلەرگە ءتان قاسيەت. ادام ەشقاشان پەرىشتە سياقتى بولا المايدى. ويتكەنى ادامنىڭ ءومىرى ءبىر قالىپتى ەمەس: بىرەسە جوعارىلاپ، بىرەسە تومەندەپ قۇبىلىپ تۇرادى. ادام بالاسى كەيدە پەرىشتەلەردى قىزىقتىراتىنداي تاقۋالىققا بەرىلسە، كەيدە حايۋاننان دا بەتەر ازعىنداپ كەتەدى.

ال، پەرىشتەلەردىڭ دارەجەلەرى تۇراقتى. ولار نۇردان جاراتىلعاندىقتان، اللاھ تاعالاعا ەش قارسى كەلمەيدى. وسى قاسيەتىمەن ولار ادامدار مەن جىنداردان ەرەكشەلەنەدى. پەرىشتەلەر ەر-ايەل بولىپ بولىنبەيدى، ويتكەنى ولاردا جىنىس دەگەن ۇعىم جوق. ولار اشۋلانبايدى، كەك ساقتامايدى، قىزعانبايدى، ياعني جالپى العاندا، ولاردىڭ جاراتىلىستارىندا وعاش مىنەز-قۇلىق بولمايدى.

ولار ادامدار مەن جىنداردا كەزدەسەتىن كەمشىلىكتەر مەن نۇقساندىقتاردان دا پاك. پەرىشتەلەر ءىشىپ- جەمەيدى، اشىقپايدى، شولدەمەيدى، شارشاۋ دەگەندى بىلمەيدى. ىستەرى ءۇشىن اقى- سىي تالاپ ەتپەيدى، كەرىسىنشە اللاھ تاعالانىڭ رازىلىعى ءۇشىن جاساعان امالدارىنان جاعىمدى اسەر الادى، راحات تابادى.

ولاردا لاۋازىمعا يە بولۋ، جوعارىلاۋ دەگەن ۇعىم جوق، تەك اللاھ تاعالاعا جاساعان قۇلشىلىقتارىنان دارەجەلەرىنە قاراي ءلاززات الادى. نۇردان جاراتىلعانى ءۇشىن، ازىقتارى دا نۇر. قالايشا ادامدار سۋ، اۋا، جارىققا مۇقتاج بولىپ، ءتۇرلى ازىقتارمەن قورەكتەنسە، سولاردان ءلاززات السا، پەرىشتەلەر دە زىكىر، ءتاسبيح، حامد، عيبادات، اللاھ تاعالاعا دەگەن سۇيىسپەنشىلىكتەرى مەن ماعريفات نۇرىمەن ازىقتانىپ، سولاردان ءلاززات الادى.

ءتىپتى، حوش يىستەر دە ولاردىڭ ازىعى بولىپ تابىلادى. ولار ادەمى حوش يىستەردى ۇناتادى. ءسوزدىڭ رەتى كەلگەندە، ۇلگى-ونەگە يەسى پايعامبارىمىزدىڭ (ساللاللاھۋ ءالايھي ءۋا ءساللام) ادەمى حوش يىستەردى ۇناتقانىن جانە ۇنەمى ۇستىنە جۇپار ءيىس سەپكەنىن ايتا كەتەيىك.

tv.qamshy.kz