قازاقتىڭ كوك تۋىن الەمدە بەسىنشى رەت جەلبىرەتكىم كەلەدى - سامبودان ءتورت مارتە الەم چەمپيونى ە. بايباتىروۆ

ورال. قازاقپارات - بيىل قاراشا ايىندا ماروككونىڭ كاسابلانكا قالاسىندا سامبودان كەزەكتى الەم چەمپيوناتى وتەدى. مىنە، سوندا قازاقتىڭ كوك تۋىن تاعى ءبىر بيىكتە جەلبىرەتكىم كەلەدى. بۇل تۋرالى قازاقستاننىڭ ەڭبەك سىڭىرگەن سپورت شەبەرى، سامبودان ءتورت دۇركىن الەم چەمپيونى، الەم كۋبوگىنىڭ يەگەرى ەربولات بايباتىروۆ ءمالىم ەتتى.

ونىڭ ايتۋىنشا، دۇنيە جۇزىندە ۇزدىك شىعۋ وڭاي ەمەس. بۇل جولى ول 57 كەلى سالماقتا سىنعا تۇسەدى. نەگىزگى قارسىلاستارى رەتىندە ورىس، گرۋزين، تاجىك پالۋاندارىن سانايدى. كوپتەن بەرى بەرىك جۇماعاليەۆ پەن رايىمبەك مەڭدىعاليەۆتىڭ باسشىلىعىمەن جاتتىعىپ كەلە جاتقان داڭقتى سامبوشىنىڭ العان اسۋلارى از ەمەس. راس، الەمنىڭ ءتورت مارتە چەمپيونى بولعاننان كەيىن وليمپياداعا قاتىسپاق نيەتپەن دزيۋدودا دا باق سىناپ كوردى. ءبىراق وعان كۇرەستىڭ بۇل ءتۇرى قول بولماي شىقتى. وسىنداي اۋىسۋدىڭ اسەرىنەن بە، كەيىنگى جىلدار ەربولات ءۇشىن اسا ءساتتى بولا قويعان جوق.

«ەلباسىمىزدىڭ سپورتقا ءاردايىم كوڭىل بولەتىنىن جۇرتشىلىق جاقسى بىلەدى. مەملەكەتتىڭ ءانۇرانى دا سپورتشى جەڭىس تۇعىرىنا كوتەرىلگەن مەزەتتە وينالاتىنى بەلگىلى. وسىنداي باقىتتى ءساتتى مەن دە تالاي باسىمنان كەشىردىم. بۇل، ارينە تىنباي جاتتىعۋ كەزىندە توككەن تەرىڭ مەن باپكەرلەر ەڭبەگىنىڭ دە وتەۋى. كەۋدەڭدى قۋانىش كەرنەۋمەن بىرگە قازاق ەلىن الەمگە تانىتۋعا ءوزىڭنىڭ ۇلەس قوسقانىڭا شۇكىرلىك ەتەسىڭ. ەڭ باستىسى، شەت ەلدە ءوز ەلىڭنىڭ ءانۇرانى قالىقتاپ، كوك تۋى جەلبىرەگەنى قانداي عانيبەت. وعان جەتەتىن ەشتەڭە جوق. الايدا تويلاپ تاعى جۇرە المايسىڭ. ەلگە كەلگەن بويدا جاتتىعۋعا قايتا كىرىسەسىڭ. ويتكەنى الدا جاڭا جارىستار تۇر»، - دەدى ە. بايباتىروۆ.

اۆتور: ەلجان ەرالى