تۇركيانىڭ دجەيحان قالاسىندا «قازاقستان» مادەني ورتالىعى اشىلدى

استانا. قازاقپارات - تۇركيانىڭ جەرورتا تەڭىزى ايماعىندا ورنالاسقان دجەيحان قالاسىندا «قازاقستان» مادەني ورتالىعى اشىلدى.

بۇل تۋرالى سول ەلدەگى مەنشىكتى ءتىلشىمىز ەرجان ءجۇنىس حابارلايدى.

قازاقستاننىڭ كورىكتى جەرلەرىنەن تۇسىرىلگەن فوتوسۋرەتتەر مەن تۇركى دۇنيەسىنە تانىلعان اقىن- جازۋشىلارىمىزدىڭ تۇرىك تىلىنە اۋدارىلعان كوركەم شىعارمالارىنا توردەن ورىن بەرگەن بۇل ورتالىق حالقىمىزدىڭ سالت-ءداستۇرى مەن مادەني مۇرالارىن كەڭىنەن ناسيحاتتاۋدى كوزدەيدى.

الداعى ۋاقىتتا مۇندا ەلىمىز جايلى ءارتۇرلى مادەني شارالار ۇيىمداستىرىلماق. مىسالى جاقىن ارادا دجەيحاندا قازاق كينوسىنىڭ اپتالىعى وتەدى. ونىڭ اياسىندا جەرگىلىكتى تۇرعىندار «قىز جىبەك»، «تاقيالى پەرىشتە»، «كوشپەندىلەر»، «بالالىق شاعىمنىڭ اسپانى» مەن «بايتەرەك» فيلمدەرىن تاماشالايتىن بولادى.

ەيۋپ تۋرىت، دجەيحان قالاسى مادەنيەت باسقارماسىنىڭ ءتوراعاسى:

- ەكى ەل پرەزيدەنتتەرىنىڭ تۋىستىق پەن دوستىققا قۇرىلعان تىعىز قارىم-قاتىناستارىنىڭ ارقاسىندا باۋىرلاس قازاق-تۇرىك ىنتىماقتاستىعى بارلىق سالادا قارقىندى دامۋدا. اسىرەسە مادەني-رۋحاني باعىتتاعى بايلانىستارىمىز وتە جوعارى. بۇگىن مىنە، سونىڭ ايقىن دالەلى رەتىندە قالامىزدا «قازاقستان» مادەني ورتالىعى سالتاناتتى تۇردە اشىلدى.

www.24.kz