باتىس قازاقستان وبىلىسىندا ون ءۇش جاسار وقۋشى قوس بىردەي قىزدى قۇتقاردى - فوتو
ب ق و ت ج دەپارتامەنتىنەن تۇسكەن مالىمەتكە قاراعاندا، جەتىنشى سىنىپتى ويداعىداي بىتىرگەن ن. تيۋرين 24 - مامىر كۇنى دوستارىمەن بىرگە دۇكەنگە بارادى.
جول- جونەكەي كەزدەستىرگەن ەكى قىزدىڭ ءبىرى ءوزىنىڭ سىنىپتاسى ەدى. دۇكەن جانىندا دوستارى قالىپ قويادى دا، نيكيتا قىزدارمەن اڭگىمەلەسىپ، سۋعا شومىلۋدى ءجون كورەدى. وزەن ورتاسىنا دەيىن ءجۇزىپ بارعان ول ارتىنا قاراسا، قىزداردىڭ ءبىرى سۋعا شاشالىپ، باتىپ بارا جاتقان. سول بويدا كومەككە ۇمتىلىپ، ونى جاعاعا شىعارادى. ەندى ەكىنشى قىز ايقايلاپ جاردەمگە شاقىرادى. وعان جەتكەن كەزدە قىز كورىنبەي كەتكەن ەدى. بالا بىرنەشە رەت سۇڭگىگەننەن كەيىن عانا سۋ استىندا ەشقانداي قوزعالىسسىز جاتقان قىزدى تاۋىپ، 20 مەتر جەرگە دەيىن سۇيرەپ، جاعاعا تارتىپ شىعارادى. سول جەردە كەۋدە تۇسىنان جاساندى تىنىس الدىرۋ ءادىسىن جاسايدى. سودان كەيىن عانا اۋزىنان سۋ شىققان قىز دەمالىپ كەتتى.
ب ق و ت ج دەپارتامەنتى جەتىنشى سىنىپ وقۋشىسىنىڭ ەرلىگىن نازاردان تىس قالدىرمادى. اناسىمەن بىرگە شاقىرىپ، قۇرمەت كورسەتتى. ت ج دەپارتامەنتى ازاماتتىق قورعانىس باسقارماسىنىڭ باستىعى زامير بەرداشيەۆ جاسوسپىرىمگە باتىل ارەكەتى ءۇشىن العىسىن ءبىلدىرىپ، ونى كاسىبي قۇتقارۋشىلار دايارلايتىن كوكشەتاۋ تەحنيكالىق ينستيتۋتىنا وقۋعا شاقىردى. بالانىڭ اناسى ولگا يۆانوۆنا ۇلىنىڭ ەرلىگىمەن ماقتاناتىنىن جەتكىزدى.
