مۇعالىمنىڭ ورىندىعىنا شەگە قاققاندار بالەگە قالدى

 ورال. قازاقپارات - باتىس قازاقستان وبىلىسى زەلەنوۆ اۋدانى چۋۆاشكا اۋىلىندا ەكى وقۋشى مۇعالىمدى «كۇلكى قىلۋ» ءۇشىن ورىندىعىنا شەگە قاققان.

سونىڭ سالدارىنان مۇعالىم جەڭىل دەنە جاراقاتىن العان ءارى مورالدىق تۇرعىدا زارداپ شەككەن.

وبلىستىق سوتتىڭ باسپا ءسوز قىزمەتىنەن تۇسكەن مالىمەتكە قاراعاندا، باتىس قازاقستان وبىلىسىنىڭ كامەلەتكە تولماعاندار ءىسى جونىندەگى مامانداندىرىلعان اۋدانارالىق سوتىنىڭ ۇكىمىمەن ت. دەگەن جاسوسپىرىم ق ر ق ك 108-بابىنا سايكەس (قاساقانا جەڭىل دەنە جاراقاتىن سالۋ) ايىپتى دەپ تانىلدى، ءبىراق جابىرلەنۋشىمەن تاتۋلاسۋىنا بايلانىستى ق ر  ق ك 68-بابى 1- ءبولىمى نەگىزىندە قىلمىستىق جاۋاپكەرشىلىكتەن بوساتىلدى. ال كامەلەتكە تولماعان ك. ق ر ق ك 108-بابى بويىنشا كىنالى دەپ تانىلىپ، وعان 40 ساعات مەرزىمگە قوعامدىق جۇمىس تۇرىندەگى جازا بەلگىلەندى.

سوت ۇكىمى زاڭدى كۇشىنە ەنگەن جوق.

اۆتور: ەلجان ەرالى