بەلارۋس قازاقستانعا ءتورت قىلمىسكەردى ۇستاپ بەردى
ۆەدومستۆونىڭ مالىمەتىنشە، رەسپۋبليكامىزدىڭ اۋماعىندا قىلمىس جاساعان قازاقستاننىڭ ءۇش ازاماتى يگور سىچيەۆ، داريا فلوريس، كريستينا ۆەبەر مەن تۇركيا ازاماتى نەبي بايرامدى قىلمىستىق جاۋاپكەرشىلىككە تارتۋ ءۇشىن قازاقستانعا ۇستاپ بەرۋ تۋرالى ق ر باس پروكۋراتۋراسىنىڭ ءوتىنىشى بەلارۋس رەسپۋبليكاسىنىڭ باس پروكۋراتۋراسىمەن قاناعاتتاندىرىلدى.
ايتا كەتەيىك، فلوريس پەن ۆەبەر بىرنەشە رەت جانە اسا ءىرى كولەمدە جاسالعان الاياقتىق ءۇشىن قازاقستاننىڭ قۇقىق قورعاۋ ورگاندارىمەن ىزدەۋدە بولدى. ال سىچيەۆ قاساقانا دەنساۋلىققا اۋىر زيان كەلتىرىپ، قىلمىستى قۋدالاۋ ورگاندارىنان جاسىرىندى، بايرام ۇيىمداسقان قىلمىستىق توپقا قاتىسقانى ءۇشىن جانە بىرنەشە رەت اسا ءىرى كولەمدە ۇ ق ت قۇرامىندا ەكونوميكالىق كونتراباندا جاساعانى ءۇشىن ىزدەۋدە بولدى.
«بيىل قاڭتار ايىندا ولاردىڭ بارلىعى بەلارۋس قىزمەتىمەن ۇستالدى. ەكى ەلدىڭ باس پروكۋراتۋرالارى اراسىنداعى ناقتى قويىلعان جۇمىس پەن ورنىقتىرىلعان ءوزارا ارەكەتتەستىكتىڭ ناتيجەسىندە ولاردىڭ قازاقستانعا بەرىلۋى تۋرالى شەشىم قابىلداندى»، - دەلىنگەن باس پروكۋراتۋرانىڭ حابارلاماسىندا.
ىزدەۋدەگى ادامدار بۇگىن بەلارۋس رەسپۋبليكاسىنان قازاقستانعا ەكستراديتسيالاندى جانە استانا قالاسىنىڭ ۋاقىتشا ۇستاۋ يزولياتورىنا قامالدى. قازىرگى ۋاقىتتا ءىس بويىنشا تەرگەۋ جۇمىستارى ءجۇرىپ جاتىر.
