08:35, 03 - ماۋسىم 2015 | GMT +5
شۆەتسيادا ءۇندىستان پرەزيدەنتىنىڭ كورتەجى جول اپاتىنا ۇشىرادى
استانا. قازاقپارات - شۆەتسيادا رەسمي ساپارمەن جۇرگەن ءۇندىستان پرەزيدەنتى پراناب كۋمار مۋكەردجي كورتەجىنىڭ كولىكتەرى جول-كولىك وقيعاسىنا ۇشىراپ، سونىڭ سالدارىنان التى ادام زارداپ شەككەن.
وقيعا ۋپسالا ۋنيۆەرسيتەتتىك قالاشىعىنىڭ وڭتۇستىك بولىگىندەگى اينالمالى جولدا ورىن العان.
كورتەجدە پرەزيدەنتتەن باسقا شۆەتسيانىڭ تاق مۇراگەرى حانشايىم ۆيكتوريا مەن ونىڭ كۇيەۋى، حانزادا دانيەل بولعان. СВТ تەلەارناسىنىڭ حابارلاۋىنشا، الدىڭعى اۆتوموبيلدىڭ كەنەتتەن تەجەلۋى كەزىندە سوڭىندا كەلە جاتقان ءتورت كولىك سوقتىعىسقان. كولىك تىزبەگىنىڭ باسىنداعى ءۇندىستان پرەزيدەنتى، حانشايىم مەن ونىڭ كۇيەۋى ساپارىن جالعاستىرا الدى.
كورولدىكتىڭ باسپا ءسوز قىزمەتىنىڭ حابارلاۋىنشا، تىزبەكتىڭ سوڭعى كولىكتەرىندە وتىرعان ادامدار اۋىر جاراقاتتار العان جوق. وقيعا ورنىنا ەكى جەدەل جاردەم كولىگى كەلىپ جەتتى.
