قىتايدا ادامنىڭ بەت-الپەتىن تانيتىن بانكومات جاسالدى

استانا. قازاقپارات - قىتاي ادامدى جۇزىنەن تانۋ تەحنولوگياسىنا يە الەمدەگى ەڭ العاشقى بانكوماتتى قۇراستىردى.

ەگەر قىزمەتتى قولدانۋشىنىڭ كەلبەتى تىركەلگەن نەسيە كارتاسىنىڭ يەسىمەن سايكەس كەلمەسە، بانكومات اقشا بەرمەيدى. حانجوۋ قالاسىنداعى Tzekwan تەحنولوگيالىق كومپانياسى مەن شينحۋا ۋنيۆەرسيتەتىنىڭ ماماندارى بىرىگە جاساعان بانكومات بيومەترلىك ۇلگىگە يە بولدى، دەپ جازادى قىتايلىق شينحۋا اقپاراتتىق اگەنتتىگى.

بيومەترلىك بانكوماتتىڭ الدىنا ورناتىلعان كامەرا قولدانۋشىنىڭ بەتىن سۋرەتكە الىپ، وزىندە بار مالىمەتپەن سالىستىرادى. قۇراستىرۋشىلاردىڭ ايتۋىنشا، جاڭا جۇيە ادامنىڭ بيولوگيالىق ەرەكشەلىكتەرىن دە اڭعارا الادى. سوندىقتان ادامنىڭ ءتۇرىنىڭ ءار ءتۇرلى سەبەپپەن وزگەرىسكە ۇشىراۋى ەشقانداي قيىندىق تۋدىرمايدى ەكەن.

Tzekwan كومپانياسىنىڭ باس ديرەكتورى گۋ زيكۋن (Gu Zikun) بانك قىزمەتىن كورسەتۋدىڭ جاڭا ۇلگىسى جۋىردا نارىققا شىعاتىنىن حابارلادى. ال اپپاراتتىڭ جۇمىس ىستەۋ الگوريتمى تۋرالى ازىرگە ەشتەڭە ايتىلمادى.

گۋدىڭ ايتۋىنشا، ادامنىڭ بەينەسىن تاني الاتىن ا ت م-بانكوماتتار قارجى قىلمىسىنا قارسى كۇرەستىڭ كۇشەيۋىنە ايتارلىقتاي سەپتىگىن تيگىزەدى. سونىمەن قاتار، بانكومات قاۋىپسىزدىكتى تولىعىمەن قامتاماسىز ەتۋ ماقساتىندا ءوزى بەرگەن اقشانىڭ سەريالىق نومىرلەرىن ساقتاپ وتىرادى.

رەسمي اقپاراتقا وراي، جاڭا جۇيەمەن جابدىقتالاتىن قىزمەت ۇلگىسى بۇگىندە قولدانىلىپ جۇرگەن بانكوماتتارعا قاراعاندا %20 عا ۇتىمدى جۇمىس ىستەيتىن بولادى، دەپ جازادى massaget.kz.