تۋريستەردىڭ اعىلۋى كۋبا بيلىگىن الاڭداتۋدا
ەسەسىنە بۇل جاعداي كۋبا ەكونوميكاسىنا وڭ اسەر ەتە باستادى. 1492 - جىلى ايگىلى ساياحاتشى حريستوفور كولۋمب كاريب تەڭىزىندە اشقان ارالى كۋبا بولدى. سول كەزدەن بەرى بۇل جەردە العاشقى قونىس مەكەندەرى پايدا بولدى. ەلدە اۋىلشارۋاشىلىعى جاقسى دامىپ، باي ەۋروپالىقتاردىڭ يەلىگىندە بولعان الىپ پلانتاتسيالار ورنادى.
1990 - جىلدان باستاپ بوستاندىق ارالىندا تۋريزم سالاسى بىرتىندەپ دامي باستادى. ايماقتا جاڭا قوناقۇيلەر، مەيرامحانالار مەن دەمالىس ورىندارىنىڭ قۇرىلىسى قارقىن الدى. قازىر گاۆانا ورتالىعى ساياحاتشىلارعا لىق تولى. جاندانعان كوشەلەردە مۋزىكانتتار مەن قىزمەت كورسەتەتىن ورىنداردىڭ جۇمىسى قىزا ءتۇستى. ارالعا كۇن سايىن مىڭداعان تۋريست كەلەدى. قازىر ولاردىڭ كوبى ا ق ش ازاماتتارى. ا ق ش پەن كۋبا قاتىناستارى جاقسارعاننان بەرى ەلگە 3 ايدا كەلگەن ساياحاتشىلار سانى وتكەن جىلمەن سالىستىرعاندا %36 عا ءوستى.
ستاتيستيكاعا سۇيەنسەك، سوڭعى بەس ايدا كۋباعا 51 مىڭنان استام امەريكالىق كەلگەن. ودان باسقا وزگە ەلدەن كەلۋشىلەر دە بار. تاريحي ورىندار ساياحاتشىلاردان بوساماي جاتىر. جەرگىلىكتى بيلىك بۇعان ءبىر جاعىنان قۋانسا، ەكىنشى جاعىنان الاڭداۋشىلىق بىلدىرۋدە. ويتكەنى، ادام سانىنىڭ كوپتىگى عاسىرلار بويى ساقتالعان مادەني مۇرالار مەن تاريحي عيماراتتارعا زيان كەلتىرۋى مۇمكىن. الايدا قىزمەت كورسەتۋ سالاسى بارلىق تۋريستەردىڭ كوڭىلىنەن شىعادى دەپ ايتۋ ءازىر قيىن. سوندىقتان قازىر الەمدىك ستاندارتقا ساي كەلەتىن قوناقۇيلەر مەن وزگە دە دەمالۋ ورىندارىن سالۋ تۋرالى جوسپار ازىرلەنىپ جاتىر.
گاۆانادا دەمالاتىن ورىندار جوق ەمەس، بار. الايدا وسىنشاما سانى كوپ تۋريستكە جەتپەيتىن كورىنەدى. جاقىن ارادا ولاردىڭ سانى بۇدان دا ارتا تۇسەدى. جەرگىلىكتى بيلىك بۇعان دايىن بولۋى كەرەك. 50 جىلعا سوزىلعان ەكونوميكالىق ەمبارگولار بىرتىندەپ ءوز كۇشىن جويا باستادى. ەندى كەز كەلگەن ا ق ش ازاماتىنا كۋباعا ارنايى رۇقساتسىز كەلىپ- كەتۋىنە بولادى. ال گاۆانا بولسا وسى قوناقتارعا ءتيىستى قوناقجايلىلىق تانىتۋعا دايىن بولۋى ءتيىس.
www.24.kz
