كاسىبي مەملەكەتتىك اپپارات قۇرىپ، جەمقورلىققا قارسى كۇرەستى كۇشەيتۋ قاجەت - ءماجىلىس دەپۋتاتى

 استانا. قازاقپارات - كاسىبي مەملەكەتتىك اپپارات قۇرىپ، جەمقورلىققا قارسى كۇرەستى كۇشەيتكەندە عانا ءبىزدىڭ بولاشاعىمىز جارقىن. بۇل پىكىردى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندەگى بريفينگتە ق ر پارلامەنتى ءماجىلىسىنىڭ دەپۋتاتى ەركىن شپانوۆ ءبىلدىردى.

«ەگەر ءبىز ەگەمەندى ەل بولىپ، ۇلكەن مەملەكەتتىك دارەجەگە جەتەمىز دەسەك، كاسىبي مەملەكەتتىك اپپارات قۇرىپ، جەمقورلىققا قارسى كۇرەستى كۇشەيتۋىمىز قاجەت. ولاي بولماعان جاعدايدا ءبىزدىڭ بولاشاعىمىز، مەملەكەتىمىزدىڭ ارى قاراي دامۋى ەكىتالاي»، - دەدى دەپۋتات.

ونىڭ ايتۋىنشا، قازىرگى الەمدە ورىن الىپ جاتقان ءتۇرلى سىن- قاتەرلەرگە، ەكونوميكالىق سانكسيالارعا ەلباسىنىڭ «نۇرلى جول» باعدارلاماسى توسقاۋىل قويا الادى. اتالعان باعدارلامانى جۇزەگە اسىرۋعا 24 ميلليارد دوللار قارجى ءبولىنىپ وتىر. بۇعان قوسا كۇنى كەشە قابىلدانعان قازاقستان پرەزيدەنتىنىڭ «100 ناقتى قادام - ۇلت جوسپارى دا» «نۇرلى جول» اياسىنداعى شارالاردى جۇزەگە اسىرۋعا نەگىز بولادى.

«100 ناقتى قادامنىڭ» ءاربىر قادامى تۇسىنىكتى سوزبەن جازىلعان ءارى ولاردىڭ بارلىعىن دا جۇزەگە اسىرۋعا بولادى. ەلباسىمىز اتاپ وتكەندەي، ۇلكەن مەملەكەت بولۋىمىز ءۇشىن بۇگىنگى زامان تالابىنا ساي رەفورما جاساۋىمىز كەرەك. ولاي بولماعان جاعدايدا توقىراۋعا ۇشىرايمىز»، - دەدى ە. شپانوۆ.

 اۆتور: مارلان جيەمباي