ءتىل جانە مادەنيەت فەستيۆالىندە قازاقستاندىقتار جۇلدەلى ورىنداردان كورىندى
ال گالا- كونسەرت گەرمانيانىڭ دورتمۋند قالاسىندا ءوتتى. قۇرالاي مەيرامبەك اۋەلەتىپ ءان سالعاندا تۇرعىلىقتى تۇرىكتەردىڭ ءوزى تاڭداي قاعىپ تامساندى. ويتكەنى ول تۇرىك تىلىندەگى ءاندى ناقىشىنا كەلتىرىپ، تاماشا ورىنداپ شىقتى. قازىلار القاسى دا جوعارى باعا بەرىپ، باعى مەن بابى كەلىسكەن جەرلەسىمىز جۇزدەن جۇيرىك شىقتى.
12 جاسار جەتكىنشەك بۇعان دەيىن دە تالاي بەلەستەردى باعىندىرعان بولاتىن. ول بەلارۋس، يسپانيا مەن يتاليادا وتكەن حالىقارالىق بايقاۋلاردا ءبىرىنشى ورىننان كورىنگەن.
قۇرالاي مەيرامبەك، بايقاۋ جەڭىمپازى:
- مەن 3 جاسىمنان ءان سالامىن، ال 5 جاسىمدا ۇلكەن ساحناعا شىقتىم. رۋمىنيادا ماحاببات تۋرالى ءاندى ورىندادىم. بۇل بايقاۋعا ۇلكەن دايىندىقپەن كەلدىم. انام مەن اكەمە العىسىم شەكسىز. ولار مەنى ءاردايىم قولداپ، بولاشاعىما سەنەدى.
الەمنىڭ ءار قيىرىنان كەلگەن ونەرپازدار اننەن شاشۋ شاشىپ، بيدەن ورنەك سالدى. بي بايقاۋىنان دا قازاقستاندىق ونەرپازدار قۇر الاقان قايتپادى. مىڭ بۇرالعان بيشىلەر ءۇشىنشى ورىندى ولجالادى.
نۇرعيسا انۋاربەك، ءبيشى:
- بۇل جولى بىزگە ساتتىلىك سەرىك بولمادى. قارسىلاستارىمىزدىڭ جولى بولىپ كەتتى. ءبىرىنشى ورىندى قىرعىزستاننان كەلگەن بيشىلەر يەلەندى، ال ەكىنشى ورىن يندونەزياعا بۇيىردى.
بيىل ءتىل جانە مادەنيەت فەستيۆالى ا ق ش، ەفيوپيا، تانزانيا، تايلاند، اۆستراليا سياقتى الەمنىڭ 15 ەلىندە ۇيىمداستىرىلدى. ال حالىقارالىق دەڭگەيدەگى شاراعا 165 مەملەكەتتىڭ دارىندى وكىلدەرى قاتىسىپ، باق سىنادى.
مۇسا ەرەن، توپ جەتەكشىسى (قازاقستان):
- ءبىزدىڭ دەلەگاتسيا جوعارى دەڭگەيدە ونەر كورسەتتى. جەتىستىگىنە ءبىز دە قۋانىشتىمىز. نەگىزىنەن ولار - قازاق- تۇرىك ليسەيىنىڭ وقۋشىلارى. بالالارىمىز كورەرمەننىڭ كوزايىمىنا اينالىپ، ەلىمىزدىڭ مارتەبەسىن اسقاقتاتتى.
گالا- كونسەرتتى 10 مىڭداي كورەرمەن تاماشالادى. مۇنداي سالتاناتتى كەش بولاشاقتا قازاقستاندا ۇيىمداستىرىلۋى دا عاجاپ ەمەس. ويتكەنى كەلەر جىلى ەلىمىز فەستيۆالدى قازاق جەرىندە وتكىزۋ ءۇشىن ءوتىنىم بەرمەك.
