09:32, 01 - ماۋسىم 2015 | GMT +5
تانىمال ءانشى ەنريكە يگلەسياس ساحنادا جارالاندى
استانا. قازاقپارات - دەمالىس كۇنى يسپانيانىڭ تانىمال ءانشىسى ەنريكە يگلەسياس تيحۋانا قالاسىندا (مەكسيكا) بەرگەن كونسەرتىندە ساحنادا ءان ايتىپ ءجۇرىپ جارالانىپ قالدى، دەپ حابارلايدى «ريا نوۆوستي» مەكسيكانىڭ «La Razon» پورتالىنا سىلتەمە جاساي وتىرىپ.
كۋاگەرلەردىڭ ايتۋىنشا، ءارتىس ءان ايتىپ تۇرعانىندا سەكىرىپ، درون - كونسەرتتى ءتۇسىرۋ ءۇشىن قولدانىلاتىن شاعىن باسقارىلاتىن ۇشۋ قۇرالىن ۇستاپ الماق بولعان.
يگلەسياس كورەرمەندەرىن سۋرەتكە ءتۇسىرۋ ءۇشىن وسىعان ۇقساس ارەكەتتەردى بۇعان دەيىن دە جاساپ كورگەن، الايدا بۇل جولى ءساتسىز شىعىپ، بىرنەشە ساۋساعىن قانعا بويادى.
دارىگەرلەر كونسەرتتى توقتاتۋ قاجەتتىگىن تالاپ ەتكەنىمەن قانعا بوككەن كيىمىمەن ءانشى كونسەرتتى اياعىنا دەيىن جەتكىزدى.
