استانادا س. نارىمبەتوۆتىڭ «امانات» كوركەم فيلمىنىڭ تانىستىرىلىمى ءوتتى

استانا. قازاقپارات - بيىل عاسىرلىق مەرەيتويى اتالىپ ءوتىپ جاتقان ۇلى عالىم، قازاقتان شىققان العاشقى تاريح عىلىمدارىنىڭ دوكتورى ەرمۇقان بەكماحانوۆ مىڭ ءولىپ-مىڭ تىرىلگەن قازاقتىڭ وي ساناسىنا ەرەكشە سەرپىن بەرگەن ۇلى تۇلعا ەدى.

بۇل پىكىردى كەشە استاناداعى «كەرۋەن» ويىن- ساۋىق ورتالىعىنىڭ كينوتەاترىندا الاش ارىسىنىڭ ءومىرى مەن قىزمەتىنە ارنالعان «قازاق فيلم» ا ق كينوستۋدياسى شىعارعان ساتىبالدى نارىمبەتوۆتىڭ «امانات» كوركەم فيلمىنىڭ تانىستىرىلىمىندا بەلگىلى مەملەكەت قايراتكەرى، جازۋشى، قازاقستاننىڭ ەڭبەك ەرى ءابىش كەكىلبايەۆ ايتتى.

«ونىڭ جازىقسىز قۋدالانعانىنا قاراماستان دوكتورلىق عىلىمي اتاعىن ەكىنشى رەت قورعاپ شىعۋىنىڭ ءوزى - ۇلكەن ەرلىك. ال وكتەمشىل توتاليتارلىق جۇيەنىڭ سەڭى بۇزىلماي، سىرەسىپ تۇرعان كەزدىڭ وزىندە كەنەسارى قاسىموۆتىڭ ۇلت- ازاتتىق كوتەرىلىسى تۋرالى مونوگرافيا جازۋىنىڭ ءوزى - جانكەشتى، كوزسىز ەرلىك بولاتىن. 50 جىل عانا ءومىر سۇرگەن، ونىڭ دا كوبىن قۋعىنمەن وتكىزگەن عالىمنىڭ قازاق تاريحىنىڭ شىنايى جۇيەسىن جاساپ، كەيىنگى ۇرپاققا قالدىرعان ءتالىمدى ۇلگىسى ەشقاشان دا ۇمىتىلمايدى»، - دەدى ءا. كەكىلبايەۆ.

تانىستىرىلىمدا ءسوز العان فيلمنىڭ كەڭەسشىلەرى، بەلگىلى عالىم ماقسۇت نارىكبايەۆ، «تاماشا ادامدار ءومىرى» سەرياسىنان ماسكەۋدەن «ەرمۇقان بەكماحانوۆ» اتتى عۇمىرنامالىق كىتاپ شىعارعان جازۋشى مەدەۋ سارسەكە، تاريحشى، ق ر ۇلتتىق عىلىم اكادەمياسىنىڭ اكادەميگى مامبەت قويگەلدى، فيلمنىڭ سەناريشىسى ءارى قويۋشى- رەجيسسەرى ساتىبالدى نارىمبەتوۆ فيلمنىڭ بۇگىنگى كورەرمەن ءۇشىن ءوز تاريحىن تانۋداعى ماڭىزى تۋرالى اڭگىمە قوزعادى. اتالمىش فيلم بۇگىن ەلىمىزدە كەڭىنەن اتالىپ ءوتىپ جاتقان ساياسي قۋعىن-سۇرگىن قۇرباندارىن ەسكە الۋ كۇنىنە ورايلاستىرىلدى.

بۇدان بۇرىن، حابارلاعانىمىزداي، فيلمنىڭ جەلىسى بىرنەشە ۋاقىت ارالىعىن قامتيدى:  ⅩⅨ عاسىردىڭ ورتا تۇسى - كەنەسارى حاننىڭ تاۋەلسىزدىك جولىنداعى كۇرەسى، ⅩⅩ عاسىردىڭ ورتاسى جانە 60 - جىلداردىڭ سوڭى. فيلمدە قازاقتىڭ سوڭعى حانى كەنەسارى قاسىم ۇلى باستاعان ۇلت- ازاتتىق كوتەرىلىسكە ارنالعان زەرتتەۋلەرى ءۇشىن 25 جىلعا باس بوستاندىعىنان ايىرىلعان توتاليتارلىق جۇيەنىڭ قۇربانى، الاش ارىسى ەرمۇحان بەكماحانوۆتىڭ تاعدىرى باياندالادى.

قازاق حالقىنىڭ بولاشاعىنا الاڭداعان فيلمدەگى ءار كەيىپكەردىڭ تاعدىرى ءوز زامانىندا سۋرەتتەلسە، ولاردىڭ العا قويعان ماقسات- مۇددەلەرى ءبىر - ار-وجدانىنا بەرىك بولۋ جانە ءوز حالقىنىڭ بوستاندىعىنا قول جەتكىزۋ.

فيلمنىڭ رەجيسسەرى جانە سەناري اۆتورى - قازاقستاننىڭ ەڭبەك سىڭىرگەن قايراتكەرى، ق ر مەملەكەتتىك سىيلىعىنىڭ لاۋرەاتى ساتىبالدى نارىمبەتوۆ. باستى رولدەردە بەرىك ايتجانوۆ (ەرمۇحان بەكماحانوۆ)، قارلىعاش مۇحامەدجانوۆا (ايەلى - حاليما)، سانجار ماديەۆ (كەنەسارى حان)، ازيز بەيشەناليەۆ (ك گ ب قىزمەتكەرى).

سايلاۋ ابىلايەۆ