كۋبا لاڭكەستىكتى قولداۋشى ەلدەردىڭ تىزىمىنەن شىعارىلدى
ءدال وسى قۇجاتقا قول قويىلىپ، ءوز كۇشىنە ەنە باستاعان ساتتەن باستاپ ونىڭ بەينەجازباسى مەن سۋرەتتەرى الەمدىك بۇقارالىق اقپارات قۇرالدارىندا لەزدە تارالدى. ال ا ق ش- قا بارۋ ءۇشىن ۆيزا كۇتىپ جۇرگەن كۋبالىقتار بولسا، ەرەكشە قۋاندى.
ۆەندي بريتو، كۋبا تۇرعىنى:
- ءبىزدىڭ جامان حالىق ەمەس ەكەندىگىمىزدى تۇسىنگەنىنە وتە قۋانىشتىمىن. بۇل كەرەمەت جاڭالىق بولدى. ەلبا كارمەناتە، كۋبا تۇرعىنى:
- ءبىز ءاردايىم بەيبىتشىلىك پەن ىنتىماقتاستىق ءۇشىن كۇرەستىك. ەلىمىزدى بۇل تىزىمگە ەنگىزگەنى ادىلەتسىز بولدى. ال ەندى ادىلەتتىلىك ورنادى.
لاڭكەستىكتى قولداۋشى ەلدەردىڭ تىزىمىندە كۋبا 1982 - جىلدان بەرى تۇر. ۆاشينگتون مەن گاۆانا قارىم- قاتىناسىنىڭ جاقسارۋىنا بايلانىستى ا ق ش پرەزيدەنتى كۋبانى قارا تىزىمنەن شىعارۋى ءتيىس بولدى. ويتكەنى ەكى ەل اراسىنداعى ديپلوماتيالىق قارىم- قاتىناستى نىعايتۋ ءۇشىن ءدال وسى جاعداي باستى كەدەرگى بولعان ەدى. ەندى كۋباعا الەمدىك قارجى نارىعى مەن حالىقارالىق بانكتەرگە جول اشىق.
اق ءۇي باسشىسى باراك وباما مەن راۋل كاسترو ەكى ەل اراسىنداعى جارتى عاسىرعا ۇزىلگەن قارىم- قاتىناستى قايتا جانداندۋرۋعا نيەت بىلدىرگەننەن كەيىن 4 مارتە كەزدەسكەن بولاتىن. بارلىق كەلىسسوزدەر وڭاشا وتكەنمەن، ۆاشينگتوننىڭ گاۆاناعا قويعان كەيبىر تالاپتارى بەلگىلى. مىسالى كۋباداعى جۋرناليستيكا سالاسى مەن اقپاراتتىق تەحنولوگيا جۇمىسىن قايتا دايارلاۋ ۇسىنىسىنان رەسمي گاۆانا باس تارتىپ وتىر. بيلىك وكىلدەرىنىڭ ايتۋىنشا، بۇل ۆەنا كونۆەنتسياسىنا قايشى بولماق.
راۋل كاسترو، كۋبا پرەزيدەنتى:
- مەنى ءالى دە بولسا ولاردىڭ كەيبىر زاڭسىز ارەكەتتەرى الاڭداتادى. مىسالى تىلشىلەردى قايتا وقىتۋ تالابى. ا ق ش ولاردى تاۋەلسىز تىلشىلەر دەپ اتايدى. سىزدەردىڭ بىرەۋلەرىڭىز دە تاۋەلسىز ءتىلشى ەمەسسىزدەر. وندايدىڭ بولۋى مۇمكىن ەمەس. كۋبا حالقى امەريكالىقتاردىڭ نە نارسەگە بولماسىن وزدەرىن وقىتىپ ۇيرەتكەنىن قالامايدى.
ا ق ش ديپلوماتتارى بولسا، كورشى ەلدە وزدەرىن ەركىن سەزىنگىسى كەلەدى. الايدا كوپشىلىك كوپ ۇزاماي جاعداي وڭالاتىنىنا سەنىمدى. ال لاڭكەستىكتى قولداۋشى ەلدەردىڭ تىزىمىندە ەندى يران، سيريا جانە سۋدان ەلدەرى عانا قالدى.
www.24.kz
