ميحايل سااكاشۆيلي ودەسسا وبلىسىنىڭ گۋبەرناتورى بولىپ تاعايىندالدى
پوروشەنكونىڭ سااكاشۆيليدى ودەسسا وبلىستىق مەملەكەتتىك اكىمشىلىگىنىڭ باسشىسى ەتىپ تاعايىنداۋى تۋرالى جارلىققا قول قويعانىن ر ب ك- ۋكرايناعا ۋكراينا پرەزيدەنتى اكىمشىلىگىنەن حابارلاعان. قازىرگى كەزدە ۋكراينا پرەزيدەنتىنىڭ سايتىندا وبلىستىق مەملەكەتتىك اكىمشىلىكتىڭ جاڭا ءتوراعاسىن تاعايىنداۋ تۋرالى جارلىق ورنالاستىرىلماعان.
سااكاشۆيليدىڭ ودەسسا وبلىسىنىڭ گۋبەرناتورى بولىپ تاعايىندالعانى تۋرالى اقپاراتتى ودەسسا وبلىستىق مەملەكەتتىك اكىمشىلىگىنىڭ باسپا ءسوز حاتشىسى نيكولاي پوكروۆسكي راستادى. « ساعات 14:30 (جەرگىلىكتى ۋاقىت بويىنشا) ودەسسا وبلىستىق مەملەكەتتىك اكىمشىلىگىنىڭ جاڭا باسشىسىن تانىستىرۋ وتەدى، ءيا، ول ميحايل سااكاشۆيلي» ، - دەپ جازدى ول Facebook الەۋمەتتىك جەلىسىندەگى جەكە پاراقشاسىندا. قازىرگى گۋبەرناتور يگور پاليتسا باسپا سوزبەن تانىستىرۋ وتكەن سوڭ سويلەسۋگە دايىن، دەپ قوسىپ ءوتتى پوكروۆسكي.
گرۋزيانىڭ بۇرىنعى پرەزيدەنتى ودەسسا وبلىستىق مەملەكەتتىك اكىمشىلىگىنىڭ باسشىسى قىزمەتىنە تاعايىندالۋى تۋرالى ۇسىنىستى جۇما كۇنى پوروشەنكوعا ۋكراينا ۇكىمەتى جولداعان بولاتىن.
ودان كەيىن جوعارعى رادا دەپۋتاتى مۋستافا نايەم Twitter- دەگى جەكە پاراقشاسىندا سااكاشۆيليدىڭ ۋكراينا ازاماتتىعىن العانىن حابارلاعان. بۇل اقپاراتتى ءوزىنىڭ ميكروبلوگىندا تاعى ءبىر ۋكراينالىق پارلامەنتاري سەرگەي لەشەنكو راستاعان. تاعايىندالۋى مۇمكىن تۋرالى اقپاراتتىڭ تاراتىلۋىنان كەيىن گرۋزيانىڭ بۇرىنعى پرەزيدەنتى Facebook-تەگى پاراقشاسىندا ودەسسانى جاقسى كورەتىنىن جازعان.
