وتانعا دەگەن ماحابباتتى كەز كەلگەن ادامنىڭ جۇرەگىنە تەك ءان الەمى ارقىلى جەتكىزۋگە بولادى - س. نۇراحانوۆ

كەشە، 30 - مامىر كۇنى كەشكە «بوبەك» ۇلتتىق عىلىمي- تاجىريبەلىك، ءبىلىم بەرۋ جانە ساۋىقتىرۋ ورتالىعىندا وتكەن حالىقارالىق «BalaTurkvizyon» بالالار اندەرى بايقاۋىنىڭ اشىلۋ راسىمىندە ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورى ساعىندىق نۇراحانوۆ وسىلاي دەدى.
ونىڭ ايتۋىنشا تەك ءان، مۋزىكا الەمى ارقىلى ءاربىر ادامنىڭ بويىندا حالقىنىڭ تاريحىن بىلۋگە، سالت- ءداستۇرىن ساقتاۋعا دەگەن قۇشتارلىقتى وياتۋعا بولادى.
«حالىقارالىق «BalaTurkvizyon» بالالار اندەرى بايقاۋى جاس دارىندى انشىلەرگە جاڭا قۇدىرەتتى ءاننىڭ تۋىلۋىنا كۋا بولۋ باقىتىن سىيلايدى. بالالار! سىزدەردىڭ تالانتتارىڭىز، ونەرلەرىڭىز قازىلار القاسى تاراپىنان دا كورەرمەندەر تاراپىنان دا لايىقتى باعاسىن الادى دەگەن سەنىمدەمىن. بۇل بايقاۋ، ارالارىڭىزدا باعى جانعان جاس ءانشىنىڭ بۇكىل شىعارماشىلىق تاعدىرىن بەلگىلەپ بەرۋى مۇمكىن»، - دەدى س. نۇراحانوۆ.
«بوبەك» ورتالىعىندا وتكەن سالتاناتتى كونسەرتتىك شاراعا اتالمىش بايقاۋ اياسىندا ەلىمىزدىڭ ءاربىر وڭىرىندە ىرىكتەۋ تۋرلارىن جۇرگىزەتىن 16 تالىمگەر - ياعني، قازاقستان ەستراداسىنىڭ جاس جۇلدىزدارى قاتىسىپ، دارىندى جاسوسپىرىم انشىلەرمەن بىرگە كونسەرت بەردى.
بۇگىنگى شاراعا «بوبەك» ورتالىعىنىڭ دارىندى وقۋشىلارى، قالامىزداعى دارىندى جاسوسپىرىم انشىلەر قاتىسادى.
اۆتور: جاپپاربەرگەن ايبوتا