تىڭشىلىققا قاتىسى بار دەگەن كۇدىكپەن كەپتەر قاماۋعا الىندى

استانا. قازاقپارات - ءۇندىستاندا پوليتسيا پاكىستاننان ۇشىپ كەلگەن كەپتەردى قاماۋعا الدى. ءۇندىستاننىڭ قاۋىپسىزدىك قىزمەتى بەيبىتشىلىكتىڭ سيمۆولىنا اينالعان قۇستى «كورشى مەملەكەتتىڭ جانسىزى» دەپ كۇدىكتەنىپ وتىر.

 بۇل جايىندا «The Times of India»  اقپارات كوزى حابار تاراتتى.

 اياعىنا ۋردۋ تىلىندە جازۋ جازىلعان قاعاز بايلانعان كەپتەر پاتحانكوت قالاسىندا كوزگە تۇسكەن. ۋردۋ ءتىلى پاكىستاننىڭ كەيبىر اۋداندارىندا قولدانىلادى. بالالاردىڭ ءبىرى ونى جەرگىلىكتى شاشتاراز ماڭىنان قولعا ءتۇسىرىپ، پوليتسيا بولىمشەسىنە جەتكىزگەن. پوليتسيا قىزمەتكەرلەرى كەپتەردى رەنتگەننەن وتكىزگەنىمەن كۇدىكتى ەشتەڭە بايقالماعان. دەسە دە، كەپتەر قازىرگى ۋاقىتتا قاماۋدا، دەپ جازادى islam.kz.