قازاقستان مەن قىتاي ەركىن ساۋدا ايماعىن قۇرۋ جونىندە كەلىسىمگە كەلدى

استانا. قازاقپارات - قازاقستان مەن قىتاي كەدەن سالاسىندا ىنتىماقتاستىقتى ارتتىردى. قوس تاراپ تەمىرجول بويىنداعى قالالاردا ەركىن ساۋدا ايماعىن قۇرۋ جونىندەگى كەلىسىمگە كەلدى.

بۇدان بولەك جەماناي جانە قورعاس بەكەتتەرىندەگى «جاسىل ءدالىز» كەلىسىمىن كەڭەيتۋ بويىنشا ارىپتەستىكتى ارتتىرۋعا ۋاعدالاستى.

بۇل تۋرالى شيان قالاسىندا وتكەن «ءبىر بەلدەۋ، ءبىر جول» كەدەندىك فورۋمىندا بەلگىلى بولدى. سونىمەن قاتار فورۋم بارىسىندا قازاقستاننىڭ قارجى مينيسترلىگى مەن قىتايدىڭ باس كەدەن باسقارماسى جانە شيان كەدەن قىزمەتى مەن الماتى وبلىسى بويىنشا مەملەكەتتىك كىرىس دەپارتامەنتى ءوزارا ىنتىماقتاستىق جونىندەگى مەموراندۋمعا قول قويدى.

ايتا كەتەيىك، ءشانشي پروۆينتسياسىندا وتكەن كەدەندىك فورۋمعا «ۇلى جىبەك جولى ەكونوميكالىق بەلدەۋى» مەن « XXI عاسىرداعى تەڭىز جىبەك جولى» بويىنداعى 70 مەملەكەتتىڭ وكىلى قاتىستى.

كۋنيو ميكۋريا، بۇكىل الەمدىك كەدەن ۇيىمىنىڭ باس حاتشىسى:

- بۇل فورۋمدا مەملەكەتتىك دەڭگەيدەگى ارىپتەستىك قانا ەمەس، ازيا، ەۋروپا، ءتىپتى افريكا ەلدەرىنىڭ ايماقتارى ءوزارا ىنتىماقتاستىق جونىندەگى كەلىسىمدەر جونىندەگى سۇراقتار كوتەرىلدى. مەنىڭشە، وسىنداي ۇلكەن اۋقىمدا قارىم-قاتىناستى ارتتىرۋ وتە جاقسى ءارى قاجەت باستاما.

www.24.kz