جەر وربيتاسىنان ا ق ش- تىڭ تىڭشى عارىش كەمەسى تابىلدى
بۇل تۋرالى بەيتاراپ زەرتتەۋشىلەر حابارلادى. وسى رەتتە اۋەسقوي استرونوم تەد موۆچان بىلاي دەپتى: «باقىلاۋشىلار اپپاراتتى وربيتاداعى 312 جانە 325 شاقىرىمدىق بيىكتىكتەر اراسىنان بايقاعان.
قازىر ول ەكۆاتورعا قاراي 38 گرادۋسقا ەڭكەيدى. ال بۇل عارىش كەمەسىنىڭ ەڭ تومەنگى وربيتادا ورنالاسقاندىعىن بىلدىرەدى». مامان اۆتوماتتى قۇرىلعىنىڭ وربيتادان ءار ەكى كۇن سايىن ۇشىپ وتەتىنىن جانە بۇل ارەكەت تەك تىڭشىلىقپەن اينالىساتىن اپپاراتتاردىڭ ءىسى ەكەندىگىن اتاپ ايتتى.
جالپى X-37 باعدارلاماسى سوناۋ 1999-جىلدان بەرى ىسكە قوسىلعان. ونىڭ بارىسىندا 4 اپپارات ۇشىرىلدى. العاشقى ۇشەۋىنىڭ ماقساتى - تولىق قۇپيالى. ال ەڭ سوڭعى كەمەنىڭ الدىندا ەلەكتر قوزعالتقىشىن سىناۋ جانە ماتەريالداردى عارىشتىق ورتادا باقىلاۋ ماسەلەسى تۇر.
كەيبىر ماماندار بۇل عارىش كەمەلەرى سپۋتنيكتەردى بارلاپ، تەكسەرۋگە جانە ىستەن شىعارۋعا ارنالعانىن ايتتى. سوعان قاراماستان، پەنتاگوننىڭ رەسمي وكىلدەرى بۇل اقپاراتتى تەرىسكە شىعارىپ، كەمەلەردىڭ تەك جاڭا تەحنولوگيالاردى زەرتتەيتىندىگىن العا تارتتى، دەپ جازادى lenta.ru.
دايىنداعان: گ. ابيلوۆا
www.24.kz
