استانادا بوس جۇمىس ورىندار جارمەڭكەسى وتەدى
الداعى جارمەڭكەنىڭ نەگىزگى مىندەتتەرى - ازاماتتاردى جۇمىسپەن قامتۋعا جاردەم كورسەتۋ، ولارعا الەۋمەتتىك قورعاۋ شارالارى، سونداي-اق ەڭبەك نارىعىنداعى احۋال جونىندە اقپاراتتار ۇسىنۋ.
جارمەڭكەنى اۆتو جانە تەمىرجول ۆوكزالدار اۋدانىندا وتكىزۋدىڭ ماقساتى وسى اۋداندا ءوز قىزمەتتەرىن جۇزەگە اسىرىپ، ءوزىن-ءوزى جۇمىسپەن قامتىعان ازاماتتاردى (پاتەردى جالعا بەرۋشىلەر، تاكسي جۇرگىزۋشىلەرى، جۇك تاسۋشىلار جانە ت. ب.) جۇمىسپەن ناتيجەلى قامتىلۋعا تارتۋ بولىپ تابىلادى، سەبەبى ءوز بەتىنشە جۇمىسپەن اينالىساتىنداردىڭ نەگىزگى بولىگى الەۋمەتتىك قورعاۋ جانە قولداۋ جۇيەسىمەن قامتىلماعان.
بوس جۇمىس ورىندار جارمەڭكەسىندە جۇمىسپەن قامتۋ ورتالىعىنىڭ ماماندارى «جۇمىسپەن قامتۋ جول كارتاسى-2020» باعدارلاماسىنا قاتىسۋ جونىندەگى سۇراقتار بويىنشا كەڭەس بەرەدى، قايتا وقىتۋ جانە جاڭا ماماندىق الۋدىڭ مۇمكىندىكتەرى، جاستار پراكتيكاسىنا قاتىسۋ، الەۋمەتتىك جۇمىس ورىندارىنا جانە اقىلى قوعامدىق جۇمىستارعا ورنالاسۋ مۇمكىندىكتەرى تۋرالى ايتادى.
بۇگىندە مەكتەپكە دەيىنگى ۇيىمنىڭ تاربيەشىسى جانە تىگىنشى-وپەراتور ماماندىقتارى بويىنشا قىسقا مەرزىمدى كۋرستارعا قابىلداۋ جۇرگىزىلىپ جاتىر.
